Navoiy viloyatining bir nechta hududida 28-mart, yakshanba kuni kuchli yog‘ingarchilik bo‘lgan. 15 daqiqa yog‘gan kuchli yomg‘ir oqibatida aholi tomorqalari va dehqon bozori katta zarar ko‘rgan.
“Daryo” muxbirining aniqlik kiritishicha, kuchli yomg‘ir viloyatning Xatirchi tumani hududidagi Uchqorasoy, Tasmachisoy, Oltinsoy, Maydonsoy, Mirshodsoy, Olmontasoy, Bog‘chikalonsoy, Po‘latchi-1, Po‘latchi-2, Achchiqsag‘anoqsoy, Javshansoy soylari suvining to‘lib, tez oqishi va toshishi oqibatida kuchaygan. Soylardan to‘lib-toshgan suv tomorqa yerlari, ekin maydonlari hamda qisman aholining yashash joylariga zarar yetkazgan.
Navoiy viloyat hokimligi axborot xizmati rahbari Iskandar Ahmedovning “Daryo”ga ma’lum qilishicha, 2021-yilning 28-mart kuni soat 09:20 dan 09:35 ga qadar Navoiy shahri, Karmana va Xatirchi tumanlari hududlarida kuchli yog‘ingarchilik kuzatilgan. Jumladan, Karmana tumanida 21 nafar, Xatirchi tumanida 15 nafar aholi tomorqalari, shuningdek, Navoiy shahridagi dehqon bozori hududida yomg‘ir suvlari to‘plangan. Biroq kuchli sel fuqarolar va binolarga zarar yetkazmagan.
Bildirilishicha, aholi hovlilari va ko‘chalarda to‘plangan yomg‘ir suvlarini bartaraf etish, ularni ariq va zovurlarga yo‘naltirish hamda aholiga tushuntirish ishlarini olib borish maqsadida viloyat Favqulodda vaziyatlar boshqarmasi va uning hududiy bo‘linmalaridan 14 ta texnika, 72 ta shaxsiy tarkib, shundan 10 ta yong‘in o‘chirish avtomobili, 4 ta maxsus texnika va 11 ta motopompa jalb etilgan. Bundan tashqari, shahar, tuman hokimliklari, davlat tizimi xizmatchilik qismlari tomonidan vaziyat nazoratga olingan.
Aholining so‘zlariga ko‘ra, yomg‘ir 15—20 daqiqa kuchli sel bo‘lib yog‘gan va keyin sekinlashgan. Xatirchi tumanidagi “Oq oltin” mahallasiga kelgan kuchli sel ko‘chalarni to‘ldirib oqqan. Hududdagi zovurlar to‘lib-toshib ketgan hamda aholi ekin maydonlariga talafot yetkazgan. Bir nechta aholining yashash joylari ham suvga to‘lgan. Shuningdek, 27—28-mart kunlari sodir bo‘lgan tabiiy ofat oqibatida G‘ozg‘on va Nurota tumanidagi ko‘plab aholining ham tomorqa yerlari va ekin maydonlari zarar ko‘rgan.
Hokimlik axborot xizmati rahbari viloyat hokimi Qobil Tursunov ayni kunlarda ishchi-guruh bilan Xatirchi tumanida ekanini, har bir holat o‘rganilayotganini va zarar ko‘rgan aholiga birlamchi yordam ko‘rsatilayotganini bildirdi.
Unga ko‘ra, qishloqlarda yashovchi aholiga tezkor ko‘mak berishdan tashqari, tuman markazidagi ko‘p qavatli uylarning old va orqa qismlarida to‘planib qolgan yomg‘ir suvlari ham uylarning yerto‘la qismiga kirib borishining oldini olishga qaratilgan amaliy ishlar boshlangan.
“Tabiiy ofatdan zarar ko‘rgan tomorqa yer, ekin maydoni, shuningdek, yashash joyi egalari e’tibordan chetda qolmaydi. Ayni kunda talafot yetgan manzillarga birlamchi yordam ko‘rsatilmoqda. Holat bo‘yicha barcha muammolar bosqichma-bosqich hal etib boriladi”, — deydi Iskandar Ahmedov.
Izoh (0)