Ўзбекистон Президенти Шавкат Мирзиёев 31 март, чоршанба куни Туркий тилли давлатлар ҳамкорлик кенгашининг (Туркий кенгаш) видеоанжуман шаклида ўтадиган норасмий саммитида иштирок этади. Бу ҳақда Президент матбуот хизмати хабар қилди.
Қозоғистон ташаббуси билан чақирилаётган бўлажак олий даражадаги учрашувда Туркий кенгаш доирасидаги кўп қиррали муносабатларни янада кенгайтириш ва мустаҳкамлаш масалаларини муҳокама қилиш режалаштирилган.
Давлат раҳбари ўз нутқида бирлашмага аъзо мамлакатларнинг савдо-иқтисодий, инвестициявий, транспорт-коммуникация ва маданий-гуманитар соҳалардаги ўзаро манфаатли ҳамкорлигини кенгайтиришга доир ташаббусларни илгари суриши кутилмоқда.
2009 йил 3 октябрь куни ташкил этилган кенгашга Ўзбекистон, Озарбайжон, Қозоғистон, Қирғизистон ва Туркия аъзо. Бундан ташқари, Венгрия Туркий кенгаш ишида кузатувчи мамлакат сифатида иштирок этмоқда.
Ўзбекистон бу кенгашга 2019 йилда қўшилган. Ўша йили 15 октябрда Бокуда бўлиб ўтган саммитда Ўзбекистон илк бор тўла ҳуқуқли аъзо сифатида иштирок этган.
Туркий тилли мамлакатлар ўртасидаги алоқалар ва ишончни мустаҳкамлаш, савдо, иқтисодиёт, транспорт, энергетика, туризм ва маданий-гуманитар соҳадаги ҳамкорликни ривожлантириш, минтақада тинчлик ва хавфсизликни таъминлаш борасидаги саъй-ҳаракатларни мувофиқлаштириш ташкилотнинг асосий мақсадлари ҳисобланади.
Туркий кенгашнинг олий органи — Давлат раҳбарларининг кенгаши, доимий фаолият юритувчи ижро органи — Истанбул шаҳрида жойлашган Котибият.
Бундан ташқари, ТТДҲК шафелигида Халқаро туркий маданият ташкилоти (TURKSOY), Туркий тилли давлатлар Парламент ассамблеяси (ТуркПА) ва Туркий маданият ва мерос фонди, Халқаро Туркий академия ва Ишбилармонлар кенгаши фаолият юритмоқда.
Бундан аввал Шерзод Асадов мазкур ҳафтада Шавкат Мирзиёев қатнашадиган халқаро тадбирлар ҳақида маълумот бергани, Шуҳрат Абдураҳмонов Ислом Каримов ва Шавкат Мирзиёев раҳбарлигида ҳокимлар фаолиятида қандай фарқ борлигини айтгани ҳамда ЖССТ раҳбари Тедрос Гебрейесус Шавкат Мирзиёевга миннатдорчилик мактубини йўллагани ҳақида хабар берилганди.
Изоҳ (0)