Мозамбикнинг шимоли-шарқида жойлашган Палма шаҳрига қуролланган жангарилар ҳужум қилди. Энг камида 57 киши ҳалок бўлди, улар орасида чет эл фуқаролари ҳам бор, деб ёзмоқда «Korrespondent.net».
Палма шаҳрига 24 март куни экстремистик гуруҳ жангарилари томонидан ҳужум қилинган ва эгаллаб олинган. Қуролланган террорчилар ҳарбий казармалар ва ҳукумат биносига ҳужум қилган.
«Етти нафар чет эл фуқароси ҳалок бўлди... Менинг ҳисоб-китобларимга кўра, жами 57 киши қурбон бўлди, лекин уларнинг сони 60 нафар экани ҳақида хабарлар ҳам бор», — деди инсон ҳуқуқлари ҳимоячиси Жулия Вачаве.
Аксарият маҳаллий аҳоли яқин атрофдаги ўрмонга беркинишга улгурган. Тахминан, икки минг нафар меҳнат муҳожири қамал қилинган шаҳардан қочишнинг уддасидан чиққан.
Франциянинг Total энергетика компанияси шаҳар яқинида газни қайта ишлаш ва суюлтириш мажмуасини қураётган эди. Ҳужумдан сўнг компания қурилиш ишлари тўхтатилганини эълон қилди.
Аввалроқ Малининг шимолида жангарилар ҳарбий базалардан бирига ҳужум қилди. Оқибатда 33 нафар ҳарбий ҳалок бўлгани ҳақида хабар берилди. Мамлакат Мудофаа вазирлигининг маълумотларига кўра, 15 март куни Ансанго туманидан 60 километр узоқликда жойлашган Тессит аҳоли пунктидаги ҳарбий қисмга қуролланган террорчилар ҳужум қилди.
Шунингдек, Эфиопиянинг Шарқий Веллега провинцияси Оромия ҳудудида қуролланган одамлар Эфиопия православ черковига ҳужум қилди. Ҳужум оқибатида 30 га яқин одам ҳалок бўлди. Жангарилар черков руҳонийсини ўлдириб, одамларни ўғирлаб кетган. Жангарилар чангалидан қочиб қутулганлар ҳужумчиларни Оромо озодлик фронтининг жанговар қаноти — Оромо Озодлик армиясининг аъзолари эди, деб даъво қилмоқда. Ташкилот Эфиопиянинг ушбу ҳудуди мустақиллигини қўлга киритишга интилиб келади.
Нигериянинг Замфара штатида эса қуролланган жангарилар мактабга ҳужум уюштириб, 317 нафар ўқувчи қизни ўғирлаб кетди. Мусо Мустафо исмли маҳаллий аҳоли вакили жиноятчиларнинг мактаб яқинидаги ҳарбий лагер ва назорат-ўтказиш пунктига ҳам ҳужум уйштирганини айтган. Қайд этилишича, қўпорувчилар ҳарбийларнинг ўз ҳужумига халақит қилишини истамаган.
Кейинчалик Нигерияда ўғирлаб кетилган ўқувчи қизлар тўрт кундан сўнг қутқарилди. Болаларнинг қайтиши тўғрисида вилоят ҳукумати вакили Юсуф Идрис эълон қилди. Аммо у ўқувчи қизларнинг айнан қандай қутқарилгани ва улар учун тўлов тўлаш керакми ёки йўқлигини айтмади. Қизларнинг барчаси соғ-саломат қайтиб келди.
Изоҳ (0)