Самарқанд вилоятида 27—28 март кунлари кузатилган ёғингарчиликлар оқибатида ҳудуднинг бир қатор шаҳар ва туманларида аҳолига ноқулайлик туғдирувчи ҳолатлар юзага келган. Жумладан, вилоятда юз берган тошқин ва селлар ҳамда уларнинг оқибатлари акс этган фото ва видеолар ижтимоий тармоқларда эълон қилинган.
Фавқулодда вазиятлар вазирлигидан маълум қилишларича, 27 март куни Самарқанд вилоятининг Оқдарё туманида кучли жала қуйиши натижасида туман марказий кўчаларида сув тўпланиш ҳодисаси вужудга келган.
Вилоят ФВБ вакилларининг қайд этишича, бундай тошқинлар ички ариқларнинг чиқиндига тўлиб кетгани ёки кўмиб ташлангани, сув йўлида фуқаролар томонидан ҳар хил тўсиқлар ҳосил қилингани оқибатида келиб чиққан.
«Дарё» муштарийларининг хабар беришича, 27 мартдаги ёғингарчилик вақтида Самарқанд шаҳридаги янги қурилиб, фойдаланишга топширилган Family Park мажмуасининг томидан чакка ўтиб кетган. Қайд этишларича, бино мутасаддилари вазиятни томга целлофан ўрнатиш билан бартараф этишга уринган.
Мавзуга доир: Видео: Тошкент аэропорти томидан чакка ўтди
Сел вақтида қандай ҳаракат қилиш керак? ФВВ тавсиялари:
сел хавфи бўлган ҳудудларда яшовчи ҳар бир киши унинг уйи, хўжалигини сел келиш ҳудудида жойлашганлиги ҳақидаги маълумотга эга бўлиши керак ва «Ўзгидромет», ФВВ/ФВБ, ҳокимликлар вакиллари томонидан берилган кўрсатмалардаги сел ва сув тошқинидан ҳимоя қилиш йўл-йўриқларига, албатта, амал қилиши лозим;сел оқимининг ўтиши ва унинг оқибатлари катта моддий зарар келтириб, одамлар ҳаёт ва соғлиғига хавф туғдириши мумкин (сел оқибатида одамларнинг қурбон бўлганлиги бир неча марта қайд қилинган);
сел оқимларидан фақат қочиб қутилиш мумкин. Сел хавфи тўғрисида хабар эшитгандан сўнг дарҳол хавфсиз жойга кўчиш ҳаракатларини қилиш керак. Сел оқимининг тез фурсатда шаклланиши, унинг тезлигини ҳисобга олган ҳолда, хабар тарқатиш ва муҳофаза тадбирларини бажариш учун вақт жуда чегараланганлигини (бир неча дақиқадан 10—20 дақиқагача бўлиши мумкин) доимо ёдда тутиш лозим;
сел оқимидан халос бўлишнинг иложи бўлмаса, баландроқ тепалик устига, дарахтга ёки бирор баландроқ мосламалар устига чиқиш керак. Одатда сел 3—5 соат давом этиши мумкин. Сел оқими ўтгандан сўнг девор ва устунларнинг ҳолатини, газ, электр ва сув таъминотининг созлигини текшириш зарур.
Сизда сўнгги кунларда Ўзбекистон бўйлаб кузатилаётган ёғингарчилик оқибатлари ва уларни бартараф этиш ҳолатлари акс этган фото ва видеолар бўлса, уларни қачон ва қаерда олингани ҳақидаги маълумотни илова қилган ҳолда Telegram’даги @daryo_livebot’га юборинг.
Изоҳ (0)