Мьянманинг турли шаҳарларида мамлакат ҳокимиятини эгаллаб олган ҳарбий хунтага қарши норозилик намойишлари чоғида камида 114 киши Қуролли Кучлар вакиллари томонидан ўлдирилди. Myanmar Now нашри ушбу маълумотни маҳаллий вақт билан 27 март куни соат 21:30 (Тошкент вақти билан 20:00) ҳолатига кўра келтириб ўтди, деб ёзади Meduza.

Фото: AP Photo

Мьянма ҳарбийлари Қуролли Кучлар кунини нишонлаган 27 март куни турли шаҳарлар аҳолиси ҳарбий диктатурага қарши норозилик билдириб, кўчаларга чиққан. Ҳарбийлар мамлакатнинг 40 дан ортиқ шаҳарларида намойишчиларга қарши қурол қўллаган.

Хусусан, 27 киши Янгон округида, яна 40 киши эса Мандалай округида ўлдирилган. Myanmar Now маълумотларига кўра, Мейтхила шаҳрида 13 ёшли қизчани ўлдиришган. Reuters агентлиги Сикайн округида ҳам 13 ёшли ўспирин ўлдирилгани ҳақида ёзмоқда. Бундан ташқари, беш ёшли боланинг ўлими ҳақида маълумот келиб тушган, аммо бу тасдиқланмаган.

Бу Мьянмада ҳокимият ҳарбийлар томонидан эгаллаб олинганидан кейин юз берган энг қонли кунлардан бири бўлди, деб ёзади Reuters. АҚШ вакиллари Мьянмадаги даҳшатли зўравонликни қоралади. Буюк Британия ҳукумати Қуролли Кучлар ўзларини «шарманда қилгани»ни ёзмоқда.

Мьянмада 1 февралдаги давлат тўнтаришидан кейин бошланган норозилик намойишларида турли шаҳарларда 400 дан ортиқ киши ўлдирилган.

1 февраль куни Мьянма ҳарбийлари давлат тўнтаришини амалга оширган, ҳукуматнинг амалдаги раҳбарлари ҳибсга олинган эди. Ҳарбийлар Мьянма давлат маслаҳатчиси Аун Сан Су Чжини 11 килограмм олтин ва 600 минг доллар пулни пора сифатида олганликда айбламоқда. Давлат тўнтаришидан кейин мамлакатнинг йирик шаҳарларида норозилик намойишлари бошланган.

Март ойининг бошида ҳам Мьянмадаги полиция ҳамда кўчаларда намойиш ўтказаётган фуқаролар ўртасидаги тўқнашувларда ҳуқуқ-тартибот идоралари ходимларининг ўқотар қуролдан фойдаланиши оқибатида 38 кишининг ҳалок бўлгани маълум қилинган.

Маълумот учун, Мьянма аҳолиси 6 февраль куни Янгон кўчаларига чиқиб, ҳарбийлар томонидан ҳокимият эгаллаб олинишига қарши чиққан. Одамлар ҳарбийларга қарши эканини билдирмоқда, шунингдек, улар ҳибсга олинган юқори мартабали амалдорларни, жумладан, давлат маслаҳатчиси Аун Сан Су Чжи ва президент Вин Мьинни озод этишни талаб қилмоқда.