Токио аэропортида COVID-19 туфайли карантинга олинган аёл вафот этди

Япония пойтахти Токио яқинидаги Нарита аэропортида COVID-19’га топширган тести ижобий чиққани туфайли карантинга олинган аёл вафот этди. Бу карантин марказида содир бўлган биринчи ўлим ҳолати, деб ёзмоқда мамлакат Соғлиқни сақлаш вазирлигига таяниб, «РИА Новости».

Хиросима префектурасида яшовчи аёл Мисрдан учиб келган. Самолётдан тушгач, аёлнинг COVID-19’га топширган тести ижобий натижани кўрсатган, шу сабабли у аэропортда карантинга олинган.

Хабарга кўра, ундаги касаллик симптомларсиз кечган, аммо 27 март, шанба куни эрталаб, соғлиқни сақлаш ходимларининг кундалик текшируви пайтида аёл телефонга жавоб бермаган. Шундан сўнг унинг хонасига келган тиббиёт ходимлари аёлни ўлик ҳолда топган. Таъкидланишича, Японияда аввал бундай ҳолат кузатилмаган.

Аввалроқ Японияда тиббиёт ходимлари Филиппиндан келган эркакда коронавируснинг янги штаммини аниқлаган. Мамлакат Соғлиқни сақлаш, меҳнат ва фаровонлик вазирлигининг хабар беришича, 60 ёшли эркак Филиппиндан 25 февраль куни Токио яқинидаги Нарита халқаро аэропортига келган. Ундаги касаллик симптомларсиз кечган.

Шунингдек, Японияда музлаткич носозлиги сабаб коронавирус вакцинасининг 1000 дан ортиқ дозаси яроқсиз ҳолга келгани ҳақида хабар берилганди. Маълумотларга кўра, -80 дан -60 даражагача совуқда сақланиши керак бўлган Pfizer ва BioNTech компаниясининг вакцинаси музлаткичдаги носозлик сабабли яроқсиз ҳолга келган.