NASA яқин 100 йил ичида Ернинг астероидлар билан тўқнашиш хавфи қай даражадалигини баҳолади

Яқин юз йил ичида Ернинг астероидлар билан тўқнашиш хавфи мавжуд эмас. Бу ҳақда NASA космик агентлигига таяниб, «РБК» хабар берди.

Агентлик мутахассислари 2004 йилда кашф этилган Ер учун энг хавфли Апофис астероиди яқин юз йилда ҳеч қандай хатар олиб келмаслигини аниқлади.

Астероидни кашф этган олимлар, унинг 2029 йилда Ер билан тўқнашиши мумкинлигини даъво қилган эди. Бироз ўтиб улар астероид 2029 йил 13 апрелда Ернинг марказидан 37,6 минг км узоқликда учиб ўтишини ҳисоблаб чиқиб, тўқнашув эҳтимолини рад этди. Кейинчалик, олимлар 2036 йилда ҳам Апофиснинг Ер билан тўқнашиши хавфини истисно қилди.

NASA таъкидлаганидек, сўнгги пайтгача астероиднинг 2068 йилда Ер билан тўқнашиш эҳтимоли ҳақидаги фикрлар мавжуд эди, аммо Апофис Ердан 17 миллион км масофада (бу Ойгача бўлган масофадан 44 баравар кўп) яна бир парвозни амалга оширганидан сўнг, 5 март куни ўтказилган тадқиқотлар 2068 йилда ва ундан кейин ҳам ҳар қандай тўқнашув эҳтимолини ишончли тарзда рад этиш мумкинлигини кўрсатди.

«2068 йилдаги тўқнашув эҳтимолдан йироқ ва бизнинг ҳисоб-китобларимиз кейинги 100 йил ичида бирорта тўқнашув хавфини кўрсатмаяпти. Яқинда ўтказилган оптик ва қўшимча радиолокацион кузатувлар туфайли 2029 йил учун башорат қилинган Апофис орбитасидаги ноаниқлик юзлаб километрдан бир неча километргача камайди. Шундай қилиб, энди биз Апофисни хавф-хатарлар рўйхатидан чиқариб ташлашимиз мумкин», — деди NASA’нинг Ерга яқин объектларни ўрганиш маркази вакили Давид Фарноккиа.

NASA’нинг Апофис бўйича сўнгги ҳисоб-китоблари «Голдстоун» обсерваториясида (Калифорния жанубидаги Мохаве чўлида жойлашган) 70 метрлик антена ва Ғарбий Виржиниядаги 100 метрлик «Грин Бэнк» телескопи ёрдамида амалга оширилди. «Голдстоун» сигналларни қабул қилиб турди, «Грин Бэнк» қабул қилинган сигнал кучини икки баравар оширадиган «бистатик тажриба» ўтказди.

Олдинги радиолокацион кузатувлар Апофиснинг «икки лобли» ёки ёнғоқсимон кўринишга эгалигини кўрсатган эди. NASA’нинг таъкидлашича, бу диаметри 200 метрдан ошадиган Ерга яқин астероидлар учун нисбатан кенг тарқалган шакл.

Ҳозирда олимлар астероиднинг айланиш тезлиги ва унинг айланиш ўқи тўғрисидаги тушунчаларни такомиллаштириш устида ишламоқда. Ушбу маълумотлар 2029 йилда астероид сайёрамизнинг тортишиш майдонига кирганда унинг Ерга нисбатан йўналишини аниқлашга имкон беради, бу эса айланиш ҳолатини ўзгартириши мумкин.

2029 йил 13 апрелда Апофис астероиди Ер юзасидан 32 минг км узоқликдаги масофадан учиб ўтади, бу геосинхрон йўлдошларнинг масофасидан кам. NASA’нинг таъкидлашича, мазкур учрашув давомида Апофис Шарқий ярим шардаги кузатувчиларга телескоп ёки дурбин ёрдамисиз ҳам кўринади.