Мексикада шимолий Коуэла ва Нуэво-Леон штатлари чегарасида содир бўлаётган йирик ўрмон ёнғини туфайли 1100 киши эвакуация қилинди, деб ёзади «Известия» нашри.
Хабарга кўра, 23 март куни бошланган ёнғин оқибатида тахминан 8 минг гектар, жумладан Коуэла шаҳридаги 3,8 минг гектарга яқин ўрмон йўқ қилинган.
«ТАСС» агентлигининг хабар беришича, ёнғинни ўчириш учун 800 га яқин Ўрмон хўжалиги миллий комиссияси ишчилари ва ҳарбий хизматчилар жалб қилинган.
Айни пайтда ёнғинга қарши кураш денгиз сатҳидан 2,5 километрдан ортиқ баландликда, оғир шароитларда давом этмоқда. Ўт ўчириш билан шуғулланувчи кишилар ва самолётлар сонининг ортишига қарамай, вазиятни назорат остига олиш қийин бўлмоқда.
Табиий офат туфайли ҳалок бўлганлар ва жароҳат олганлар ҳақида маълумот берилмаган.
Эслатиб ўтамиз, 21 февраль куни Жанубий Кореянинг жануби-шарқий қисмида кенг миқёсли ўрмон ёнғини бошланган эди. Ёнғин Андонг ва Ечон шаҳарлари яқинидаги тахминан 255 гектар ўрмонни йўқ қилган.
Rainforest Foundation Norway нодавлат ташкилоти тадқиқотларига кўра, 2002 йилдан 2019 йилгача инсониятнинг фаолияти 600 минг квадрат километр ўрмонни вайрон қилди, бу деярли Франция ҳудуди билан тенг майдон ҳисобланади. Ёши улуғ тропик ўрмонларнинг 34 фоизи йўқ қилинди ва яна 30 фоизи чириб, нобуд бўлган.
Изоҳ (0)