Сувайш каналига тиқилиб қолган кеманинг қачон чиқариб олиниши мумкинлиги маълум қилинди

Сувайш каналига тиқилиб қолган Ever Given улкан контейнер ташувчи кема 27 март, шанба куни каналдан чиқарилиши мумкин. Бу ҳақда The Wall Street Journal газетасига таяниб, «РБК» хабар берди.

«Кемани саёзликдан кутилганидан олдинроқ қазиб олишимиз мумкин», — деди кемани қутқариш билан шуғулланаётган ходимлардан бири. Унинг таъкидлашича, кеманинг тумшуғи тиқилиб қолган соҳилдан уни қазиб олишга қаратилган янги уринишлар «яхши кетмоқда».

Шундай қилиб, канал тез орада кемалар ҳаракати учун қайта очилиши мумкин.

Газетанинг ёзишича, айни пайтда қутқарув гуруҳи кеманинг тумшуғи атрофидаги қум ва лойни тозаламоқда, шу орқали каналнинг суви кўтарилган пайтда кемани жойидан силжитишга уриниб кўрмоқчи.

26 март куни махсус техника ёрдамида Ever Given атрофидаги сув тубини қазиш ишлари бошланган эди.  Кейинчалик, кема оператори Berxard Shult Shipmanagment (BCC) компанияси кемани кўчиришга уринишлар муваффақиятсиз тугаганини хабар қилди.

Голландиянинг SMIT компанияси мутахассислари воқеа жойига етиб келди ва мисрлик мутахассислар билан кемани чиқариб олиш йўлларини муҳокама қилган. Компания вакиллари 28 март куни 220—240 тоннагача юк тортадиган иккита қўшимча буксир ёрдамга жалб қилинишини, бундан ташқари 27 март куни воқеа жойига АҚШ денгиз кучлари мутахассисларининг етиб келишини маълум қилган.

Дастлаб кемалар қатнайдиган йўлни очишга икки-уч кун кетиши тахмин қилинган эди. Аммо мутахассислари айни пайтда Ever Given’ни саёзликдан чиқариб олишга уринаётган Boskalis компанияси раҳбари Питер Бердовски бунга ҳафталаб вақт кетиши мумкинлигини айтган. «Эҳтимол, кемадан контейнерларни, ёқилғи ва сувни олиш, шатакчилардан фойдаланиш ва қумни ювиб юбориш каби бир неча хил усулларни биргаликда қўллашга тўғри келар», — деган у.

Эслатиб ўтамиз, Хитойдан Нидерландияга йўл олган контейнерларни ташувчи энг йирик кемалардан бири Ever Given 24 мартга ўтар кечаси Сувайш каналига тиқилиб қолди. Натижада денгиз кемалари трибандлиги ҳосил бўлган. Таъкидланишича, кемалар сафи Ҳиндистонгача чўзилган. Турли хил тахминларга кўра, кема ҳалокатига ноқулай об-ҳаво шароити, қум бўрони ёки электр энергиясининг узилиши сабаб бўлган.

City А.М. нашрининг хабар беришича, кема ҳалокати орқали канал бўйлаб ҳаракатланиш тўсиб қўйилгандан сўнг, нефть нархи кескин кўтарилган.

Кемалар қатнови бўйича Lloyd’s List компанияси ҳисоб-китобларига кўра, Сувайш каналида саёзликка тиқилиб қолган Ever Given контейнер ташувчи кемаси томонидан кемалар йўлининг тўсиб қўйилиши жаҳон савдосига соатига 400 миллион долларга тушмоқда.