Шимолий Корея томонидан баллистик ракеталарнинг учирилиши АҚШ ва Япониянинг доимий таҳдидлари олдида ўзини ҳимоя қилиш бўлган. Бу ҳақда Корея Меҳнат партияси марказий қўмитаси котиби Ли Бен Чхолнинг баёнотига асосланиб, «РБК» хабар берди.
«Яқинда амалга оширилган янги бошқарилувчи тактик ракеталарнинг синовдан ўтказилиши суверен давлатнинг ўзини ўзи ҳимоя қилиш бўйича умумбашарий ҳуқуқидан фойдаланишга тенг ҳаракат бўлди» — деди қўмита котиби.
Хабарга кўра, Ли Бен Чхол Вашингтон ва Сеулнинг ҳаракатларини қоралаган. «Жанубий Корея ва АҚШ тизимли равишда хавфли ҳарбий машғулотлар олиб бориш ва замонавий қурол турларини жорий қилиш билан Корея ярим оролига мунатазам ҳарбий таҳдид солиб келмоқда», — деди у. Қўмита котиби АҚШ Давлат департаментининг ракета учирилишидан кейинги баёнотини иғвогарлик деб атади.
«АҚШ президентининг бундай баёнотлари давлатимизнинг ўзини ҳимоя қилиш ҳуқуқига очиқдан очиқ тажовуз ва провокация», — дея қўшимча қилди у.
Эслатиб ўтамиз, 25 март куни Шимолий Корея иккита тактик ракетанинг муваффақиятли синовлари ҳақида маълум қилган. Кореялик ҳарбийлар хабарига кўра, иккала ракета ҳам КХДР шарқий қирғоқларидан 60 километр масофада жойлашган нишонга муваффақиятли бориб теккан.
КХДР Япон денгизига қарата иккита баллистик ракетани учирди. Ракета синовлари ҳақида Япония Мудофаа вазирлиги ва Жанубий Корея ҳарбийлари маълум қилган. Бунгача эса АҚШ ҳарбийлари Пхенян тез орада баллистик ракеталар учиришни қайта бошлаши ҳақида огоҳлантирган эди.
Kyodo агентлигининг хабар беришича, Япония бош вазири Ёсихиде Суга Шимолий Кореянинг баллистик ракета учириши муносабати билан Миллий хавфсизлик кенгаши мажлисини чақирган.Япония Мудофаа вазирлиги ракета учирилишини «бутун халқаро ҳамжамият, шу жумладан, Япония учун жиддий муаммо» деб атаган.
«ТАСС» агентлигининг хабар беришича, ракета учирилгани муносабати билан 30 март куни БМТ Хавфсизлик Кенгаши навбатдан ташқари кенгаш ўтказади. Агентлик маълумотларига Франция томонидан илтимос қилинган мазкур кенгаш ёпиқ шаклда ўтказилади.
Аввалроқ Шимолий Кореянинг қанотли ракеталарни синовдан ўтказгани ҳақида хабар берилганди. Хабарга кўра, Сариқ денгиз минтақасидан иккита ракета учирилган.
The Washington Post газетасининг хабар беришича, АҚШ Мудофаа вазирлиги вакиллари разведка маълумотлари Шимолий Кореянинг ракета синовларини режалаштираётгани ҳақида огоҳлантирган эди.
Газетанинг ёзишича, хабар қилинмаган ракета синовлари КХДР етакчиси Ким Чен Иннинг АҚШ президенти Жо Байденга бўлган биринчи тўғридан-тўғри даъвосини англатади.
Шу билан бирга, АҚШ маъмурияти Шимолий Корея ўтказган қисқа масофага учадиган ракеталарнинг синовини кенг кўламли провокация деб ҳисобламаган. Маъмурият вакилларидан бири амалга оширилган синовлар БМТ Хавфсизлик Кенгашининг КХДР тўғрисидаги қарорларига зид эмаслигини қўшимча қилган ва уларни «нормал ҳарбий фаолият» деб атаган.
Изоҳ (0)