Toshkent viloyati Bo‘stonliq tumani hokimligi “Amirsoy” tog‘-chang‘i kurortiga olib boruvchi avtomobil yo‘lida sodir bo‘lgan ko‘chki yuzasidan qo‘shimcha ma’lumot berdi.
Eslatib o‘tamiz, 25-mart kuni Toshkent viloyatidagi “Amirsoy” sihatgohiga olib boruvchi yo‘lda cho‘kish holati kuzatilgani sabab avtomobillar harakati vaqtincha to‘xtatilgandi.
Ma’lum qilinishicha, 2021-yilning fevral oyida Bo‘stonliq tumanning tog‘li hududlarida yog‘ingarchiliklar yillik me’yorning 366 foizi miqdorida (304 millimetr), mart oyida yillik me’yorning 229 foizi miqdorida (275 millimetr) yog‘ingarchilik yog‘ishi natijasida mazkur yo‘lning 15—21 piketi oraliqlarida yo‘l qatnov qismida dastlabki kichik yoriqlar va cho‘kishlar paydo bo‘la boshlagan.
“2021-yil fevral oyining birinchi va ikkinchi dekadasida harorat birdan isib ketishi, qorning tez erishi, mavjud qor uyumlari ustiga yomg‘ir yog‘ishi va fevral oyining uchinchi dekadasida qor yog‘ib, yerning muzlab qolishi oqibatida yog‘ingarchilik miqdori ko‘payishi hamda yer osti suvlarining ko‘tarilishi ko‘chki hodisalarining faollashishiga olib kelgan”, — deyiladi xabarda.
Bo‘stonliq tumani xavfli geologik jarayonlarni kuzatish stansiyasi mutaxassislarining olib borgan kuzatish va o‘rganish ishlari natijalariga ko‘ra, yo‘lning 15—16 piketi hamda 19—21 piketi oraliqlarida harakatdagi ko‘chki yoriqlarining uzayish, kengayish, cho‘kish, siljish hodisalari faollashgan.
25-mart kuni mutasaddi tashkilotlar mutaxassislari tomonidan ertalab harakatdagi ko‘chkining vizual hajmi — 50 000 metr kub, kechga yaqin esa taxminan 100 000 metr kub hajm atrofida bo‘lgan.
“Amirsoy” tog‘-chang‘i kurortiga olib boruvchi avtomobil yo‘lining 2—3 piketi oraliqlari yo‘lning chetki qismlarida 200 metr kub hajmda tuproq siljishi kuzatilgan. Shuningdek, yo‘lning 33—34 piketi oraliqlarida 600 metr kub tuproqning surilishi va siljishi oqibatida temir-beton to‘siq devorining qisman shikastlangani kuzatilgan.
Hozirda vaziyat to‘liq nazorat ostiga olingan bo‘lib, 3-4 kunlik kuzatuvlar va yomg‘irli kunlardan keyin ko‘chki hududida loyiha asosida yo‘lni qayta ta’mirlash ishlari olib boriladi. Ta’mirlash ishlari natijasi bo‘yicha qo‘shimcha ma’lumot beriladi.
Avvalroq Avtomobil yo‘llari qo‘mitasi mazkur holatga izoh berib, tog‘ va tog‘ oldi hududlarida bu kabi jarayonlar muntazam sodir bo‘lishini bildirgandi.
Izoh (0)