Евроиттифоқ Мьянмадаги вазият учун жавобгар бўлган 11 кишига қарши санкциялар киритади. Бу ҳақда 22 март куни Евроиттифоқ дипломатиясининг раҳбари Жосеп Боррел Брюсселда бўлиб ўтган Европа Иттифоқи кенгашининг мажлисида айтиб ўтди, деб ёзмоқда «ТАСС».
«Биз Мьянмадаги давлат тўнтариши ва намойишчиларнинг қатл этилишида иштирок этган 11 кишига қарши санкция қўллаймиз», — деди у.
Маълумот учун, президент Вин Мйин ва давлат маслаҳатчиси (унинг лавозими ҳукумат раҳбарига тенг), ҳукмрон «Демократия учун миллий лига» партияси етакчиси Аун Сан Су Чжи ноябрда бўлиб ўтган сайловлардаги фирибгарликларга жавобан қўлга олинган. Шундан сўнг Мьянмада ҳарбийлар ҳокимиятни эгаллаб олди ва бир йилга фавқулодда ҳолат эълон қилинган эди.
Давлат тўнтаришидан кейин ҳарбийлар Қуролли Кучлар бош қўмондони, катта генерал Мин Аунг Хлайнуни вақтинчалик президент этиб тайинлади ва мамлакат етакчилари ҳибсга олингач ҳокимиятни қўлга олган Мьянма Қуролли кучлари фавқулодда ҳолат бекор қилингандан сўнг янги сайловлар ўтказиш режасини эълон қилди.
Шундан сўнг Мьянма аҳолиси 6 февраль куни Янгон кўчаларига чиқиб, ҳарбийлар томонидан ҳокимият эгаллаб олинишига қарши чиқди. Ҳарбий тўнтаришдан сўнг оммавий норозилик ва иш ташлашлар бошлангач, мамлакатда интернет деярли бутунлай узиб қўйилди.
Натижада Мьянма ҳокимияти тепасига келган ҳарбийлар норозилик намойишлари туфайли кўчаларга зирҳли техникаларни жойлаштирди. Мьянма шаҳарларида бўлаётган норозилик ҳаракатларини бостириш чоғида 14 март куни 38 киши ҳалок бўлди, 80 киши жароҳатланди. Ҳуқуқ ҳимоячиларининг ҳисоб-китобларига кўра, февраль ойининг бошида ҳарбийлар ҳокимият тепасига келиб, оммавий намойишлар бошланганидан буён мамлакатда камида 126 нафар намойишчи ҳалок бўлган. СМЁА қурбонлар сони бундан ҳам кўпроқ бўлиши мумкинлигини рад этмаган.
Изоҳ (0)