Yevroittifoq Myanmadagi vaziyat uchun javobgar bo‘lgan 11 kishiga qarshi sanksiyalar kiritadi. Bu haqda 22-mart kuni Yevroittifoq diplomatiyasining rahbari Josep Borrel Bryusselda bo‘lib o‘tgan Yevropa Ittifoqi kengashining majlisida aytib o‘tdi, deb yozmoqda “TASS”.
“Biz Myanmadagi davlat to‘ntarishi va namoyishchilarning qatl etilishida ishtirok etgan 11 kishiga qarshi sanksiya qo‘llaymiz”, — dedi u.
Ma’lumot uchun, prezident Vin Myin va davlat maslahatchisi (uning lavozimi hukumat rahbariga teng), hukmron “Demokratiya uchun milliy liga” partiyasi yetakchisi Aun San Su Chji noyabrda bo‘lib o‘tgan saylovlardagi firibgarliklarga javoban qo‘lga olingan. Shundan so‘ng Myanmada harbiylar hokimiyatni egallab oldi va bir yilga favqulodda holat e’lon qilingan edi.
Davlat to‘ntarishidan keyin harbiylar Qurolli Kuchlar bosh qo‘mondoni, katta general Min Aung Xlaynuni vaqtinchalik prezident etib tayinladi va mamlakat yetakchilari hibsga olingach hokimiyatni qo‘lga olgan Myanma Qurolli kuchlari favqulodda holat bekor qilingandan so‘ng yangi saylovlar o‘tkazish rejasini e’lon qildi.
Shundan so‘ng Myanma aholisi 6-fevral kuni Yangon ko‘chalariga chiqib, harbiylar tomonidan hokimiyat egallab olinishiga qarshi chiqdi. Harbiy to‘ntarishdan so‘ng ommaviy norozilik va ish tashlashlar boshlangach, mamlakatda internet deyarli butunlay uzib qo‘yildi.
Natijada Myanma hokimiyati tepasiga kelgan harbiylar norozilik namoyishlari tufayli ko‘chalarga zirhli texnikalarni joylashtirdi. Myanma shaharlarida bo‘layotgan norozilik harakatlarini bostirish chog‘ida 14-mart kuni 38 kishi halok bo‘ldi, 80 kishi jarohatlandi. Huquq himoyachilarining hisob-kitoblariga ko‘ra, fevral oyining boshida harbiylar hokimiyat tepasiga kelib, ommaviy namoyishlar boshlanganidan buyon mamlakatda kamida 126 nafar namoyishchi halok bo‘lgan. SMYoA qurbonlar soni bundan ham ko‘proq bo‘lishi mumkinligini rad etmagan.
Izoh (0)