Birlashgan Millatlar Tashkiloti (BMT) bosh kotibi Antoniu Guterrish Myanma harbiylarini repressiyani to‘xtatishga va xalq irodasini qabul qilishga chaqirdi. U zamonaviy dunyoda hokimiyatni qurol bilan egallab olishga o‘rin yo‘qligini ta’kidladi. Bu haqda “RIA Novosti” xabar qildi.

Foto: “RIA Novosti”

“Bugun men Myanma harbiylarini repressiyani zudlik bilan tugatishga chaqiraman. Mahbuslarni ozod qiling. Zo‘ravonlikka barham bering. So‘nggi saylovlarda ifoda etilgan inson huquqlari va xalq irodasini hurmat qiling. Zamonaviy dunyoda hokimiyatning qurol bilan egallab olinishiga o‘rin yo‘q”, — dedi u 22-fevral, dushanba kuni Jenevada bo‘lib o‘tgan BMT Inson huquqlari bo‘yicha kengashi 46-sessiyasining ochilishida.

Uning so‘zlariga ko‘ra, harbiylarning xatti-harakatlari demokratiyaga putur yetkazadi.

“Fuqarolik makoniga cheklovlar qo‘yish, fuqarolik jamiyatiga qarshi hujumlar, hech qanday mas’uliyatni o‘z ichiga olmaydigan ozchiliklarga qarshi jiddiy qonunbuzarliklar, jumladan, roxinja xalqining etnik tozalanishi — bularning barchasi bora-bora kuchli bo‘ronga aylanmoqda”, — deydi Guterrish.

Shu munosabat bilan bosh kotib BMTning Inson huquqlari bo‘yicha kengashining fevral oyi o‘rtalarida qabul qilingan Myanma bo‘yicha “demokratik yo‘l bilan saylangan hukumatni tiklashni” talab qiladigan qarorini mamnuniyat bilan qabul qildi.

Ma’lumot uchun, 1-fevral kuni Myanma harbiylari mamlakatda hokimiyatni qo‘lga kiritganini e’lon qildi, ular mamlakat prezidenti va boshqa yuqori martabali amaldorlarni 2020-yil 8-noyabrda bo‘lib o‘tgan “saylovdagi firibgarliklar”ni tekshirmaganlikda ayblab, hibsga oldi. Qurolli Kuchlar bosh qo‘mondoni Min Aung Xlayn mamlakatning muvaqqat prezidenti etib tayinlandi va mamlakatda bir yil muddatga favqulodda holat joriy etildi.

Myanma aholisi 6-fevral kuni Yangon ko‘chalariga chiqib, harbiylar tomonidan hokimiyat egallab olinishiga qarshi chiqdi. Mamlakatda ommaviy norozilik va ish tashlashlar boshlangach, Transport va kommunikatsiyalarni rivojlantirish vazirligi 14-fevral, yakshanba kuni uyali aloqa operatorlariga internetga kirishni taqiqlashni buyurdi. Natijada, 15-fevral kuni ertalab sakkiz soat davomida tarmoqqa kirish imkonsizligicha qoldi. Ammo keyinchalik internet aloqasi tiklandi.

Myanma harbiylari namoyishlarga qarshi mamlakatning eng yirik shahri Yangon ko‘chalariga zirhli mashinalarni kiritgan. Mamlakat Markaziy banki yonida askarlar, zirhli transportyorlar, tartibsizlikni nazorat qilish bo‘linmalari va suv purkagichlari bo‘lgan yuk mashinalari paydo bo‘lgan. Shunga qaramay, shaharning ushbu hududida 1000 dan ortiq namoyishchilar to‘plangan.

Avvalroq hukumat to‘ntarilishi paytida harbiylar tomonidan hibsga olingan Myanma prezidenti U Vin Myint prezident saroyidan boshqa binoga ko‘chirilgani haqida xabar berilgandi. Xabarga ko‘ra, uning qayerdaligi noma’lum.

Shuningdek, to‘ntarish vaqtida hibsga olingan davlat maslahatchisi Aun San Su Chjiga qarshi 16-fevral kuni ikkinchi ayblov e’lon qilingan. Ta’kidlanishicha, endilikda Aun San Su Chji favqulodda vaziyatlar to‘g‘risidagi qonunni buzganlikda ayblanmoqda. Birinchi marta 3-fevral kuni davlat maslahatchisi import va eksport to‘g‘risidagi qonunni buzganlikda ayblangan edi.

Bundan avval Shavkat Mirziyoyev ham BMTning Inson huquqlari bo‘yicha sessiyasida nutq so‘zlagani haqida xabar berilgandi.