ЖССТ AstraZeneca билан эмлашда давом этишни тавсия қилди. Вакцинадан фойдаланиш Европа Иттифоқининг йирик давлатларида тўхтатилган

Жаҳон соғлиқни сақлаш ташкилоти (ЖССТ) коронавирусга қарши AstraZeneca вакцинаси билан эмлашни давом эттиришни тавсия қилди. ЖССТ фикрича, вакцинанинг афзалликлари унинг хавфидан устунроқ. Бу ҳақда ташкилот баёнотига таяниб, Meduza хабар берди.

ЖССТ бир қатор Европа давлатлари AstraZeneca вакцинасидан фойдаланишни тўхтатганига сабаб — қон томирларида тромб ҳосил бўлиши аслида кенг тарқалган одатий ҳол эканини таъкидлади.

«Турли мамлакатлар томонидан кенг кўламли эмлаш кампанияларида вакцинациядан кейин юзага келиши мумкин бўлган иккиламчи таъсирлар ҳақида хабар берилиши табиий ҳол. Текширувлар тўғри бўлган тақдирда ҳам, бу ножўя таъсир юзага келган ҳолатларнинг албатта вакцина билан боғлиқлигини англатмайди», — дейилади баёнотда.

Шу билан бирга, ЖССТ AstraZeneca вакцинасининг хавфсизлиги тўғрисидаги маълумотларни ўрганишда давом этишини маълум қилди. Ташкилот таҳлил тугаши биланоқ натижаларни эълон қилишга ваъда берди.

Маълумот учун, коронавирусга қарши AZD1222 вакцинаси Буюк Британия (Оксфорд университети) ва Швеция (AstraZeneca) олимлари томонидан биргаликда ишлаб чиқилган. 2020 йил ноябргача AstraZeneca препаратнинг икки дозаси билан эмланган кишиларда вакцина 70 фоиз самарадорлик кўрсатгани ва биринчи дозадан сўнг 14 кун ичида танада иммунитет ҳосил бўлгани ҳақида хабар қилган. Компания вакцинанинг жиддий иккиламчи таъсири йўқлигини айтган.

Оммавий эмлашлар бошлангандан сўнг вакцинани қабул қилганлар орасида касалхонага ётқизиш ва ўлим ҳолатлари кузатила бошлади. Ўлим ҳолатини ўрганган шифокорлар ушбу дори билан эмланганларда тромблар ҳосил бўлганини аниқлади.

Шундан сўнг бир қатор мамлакатлар препаратдан фойдаланишни тўхтатиб қўйди. Хусусан, Германия, Франция, Италия, Испания, Словения, Португалия, Кипр, Нидерландия, Австрия, Дания, Эстония, Латвия, Литва, Болгария, Ирландия, Люксембург, Норвегия ва Исландия, шунингдек, Европадан ташқаридаги Индонезия, Конго ва Жанубий Африка мамлакатларида мазкур вакцинадан фойдаланиш тўхтатилган.

Эслатиб ўтамиз, 17 март куни Тошкентга AstraZeneca вакцинасининг 660 минг дозаси олиб келинди.