Европада коронавируснинг учинчи тўлқини бошлангани эълон қилинди

Еврокомиссия вакили Дана Спинант Европада коронавируснинг учинчи тўлқини бошланганини айтди, деб хабар бермоқда «Korrespondent.net».

«Биз Европанинг турли давлатларида коронавируснинг босқичма-босқич ёки ундан ҳам тезроқ яқинлашаётган учинчи тўлқинини кўряпмиз. Жуда мураккаб давр бошланяпти, бундай вазиятда иқтисодиётимиз жиддий зарар кўради. Аҳолини эмлашни тезлаштириш зарур», — деб таъкидлади Спинант.

Унинг айтишича, Евроиттифоқ 70 фоиз аҳолини эмлашни режалаштирган.

Германия соғлиқни сақлаш вазири Йенс Шпаннинг айтишича, «пандемиянинг учинчи тўлқинини тўхтатиш учун Европада етарлича вакцина мавжуд эмас».

Аввалроқ одамлар эҳтиёт чораларига амал қилмаса, COVID-19 пандемиясининг учинчи тўлқини юз бериши мумкин, дея огоҳлантирган эди Жаҳон соғлиқни сақлаш ташкилотининг (ЖССТ) Россиядаги вакили Мелита Вуйнович.

Аввалроқ Қирғизистонда пойтахти Бишкек шаҳар мерияси коронавирус билан касалланиш сони кўпайгани сабабли ҳар йили анъанавий тарзда нишонланадиган Наврўз байрамини бекор қилиши ва Қозоғистонда коронавирус билан боғлиқ вазият ёмонлашиб, карантин кучайтирилгани ҳамда вакцинация кенгайтирилаётгани ҳақида хабар берилди.