Agar odamlar ehtiyot choralariga amal qilmasa, COVID-19 pandemiyasining uchinchi to‘lqini yuz berishi mumkin, deya ogohlantirdi Jahon sog‘liqni saqlash tashkilotining (JSST) Rossiyadagi vakili Melita Vuynovich. Bu haqda “RBK” xabar berdi.
Foto: Reuters
“Jamoaviy immunitet hali yetarlicha shakllanmagan, infeksiya tarqalishiga hech qanday to‘siq yo‘q. Ehtiyot bo‘lmasak, uchinchi to‘lqin boshlanishi mumkin. Bu odamlarning xatti-harakatlariga bog‘liq”, — izohladi Melita Vuynovich.
Shu bilan birga, Vuynovich hozirgi kunda koronavirus tarqalishining ikkinchi to‘lqini dunyo miqyosida pasayib borayotgani va infeksiya yuqtirish holatlari ketma-ket besh haftadan buyon kamayishda davom etayotganini tasdiqladi. Biroq ekspert Rossiyada niqob taqish rejimi qachon bekor qilinishini ma’lum qilmadi va bunday qaror uchun hali erta ekanini aytdi.
“Fikrimcha, shaxsiy gigiyena va kasallikdan himoya vositasi sifatida niqoblar bir muncha vaqtgacha kerak bo‘ladi”, — deya ta’kidladi Vuynovich.
“Infeksiyaning tarqalish to‘lqini sog‘liqni saqlash tizimining normal ishlashiga xalaqit bermaydigan darajaga tushganidan so‘ng koronavirus pandemiyasi tugaydi va kasallik mavsumiy tus oladi”, — dedi JSST vakili.
Uchinchi to‘lqinning boshlanish xavfi ehtiyot choralariga rioya qilish bilan bog‘liq ekani haqida ilgari bir necha bor ta’kidlangan. Jumladan, Shvetsiya bosh epidemiologi Anders Tegnell, mamlakatda kasallanish darajasi pasayganiga qaramay, odamlar cheklovlarga rioya qilmasa, virus yuqtirish holatlari ko‘payishi mumkinligi haqida ogohlantirgan. “Agar cheklovlarni ushlab turmasak, uchinchi to‘lqinning paydo bo‘lishi xavfi katta”, degan edi epidemiolog. Shvetsiya bosh vaziri esa mamlakat sog‘liqni saqlash idoralari COVID-19’ning yangi to‘lqini xavfini yetarlicha baholamaganini ta’kidlagan.
Bundan tashqari, 2020-yilning noyabr oyida JSST Yevropa mamlakatlari infeksiyaga qarshi kurash uchun zarur infratuzilmani yaratmasa, mintaqada koronavirus tarqalishining uchinchi to‘lqini ko‘tarilishi haqida ogohlantirgandi.
Yanvar oyida JSST sog‘liqni saqlash bo‘yicha favqulodda vaziyatlar dasturi direktori Maykl Rayan koronavirusni to‘liq mag‘lub etish qiyin bo‘lishini aytgan. U COVID-19 endemik kasallikka aylanishini istisno qilmagan, uning fikricha, virusni butunlay yo‘q qilish deyarli imkonsiz.
Avvalroq Qo‘shma Shtatlarda COVID-19’ga chalinish holati va uning oqibatida kasalxonaga yotqizilayotganlar soni kamaygani haqida xabar qilingandi. Mamlakatda qurbonlar soni ko‘payishda davom etsa-da, o‘lim darajasi sekinlashmoqda.
Isroilda esa koronavirusning “britancha” mutatsiyasi tarqalishi orqali bolalar orasida virusga chalinish holati ikki yarim baravarga oshgan. Bu esa Isroilning yirik klinik markazlarida ixtisoslashgan pediatrik COVID reanimatsiya bo‘limlari ochilishini talab qilmoqda.
