Қозоғистонда Нурсултон Назарбоев тасвирланган тангалар чиқарилади

Қозоғистон Миллий банки мамлакатнинг собиқ президенти Нурсултон Назарбоев тасвирланган коллексион тангаларни муомалага чиқаради. Бу ҳақда банкнинг расмий сайтига таяниб, «РБК» хабар берди.

Номинал қиймати 1000 тенге (2,4 доллар) Qazaqstannyn Astanasy — Нур-Султан деб номланган мазкур кумуш тангалар «Машҳур воқеалар ва шахслар» сериясида зарб қилиняпти. Танганинг умумий адади 1000 дона. Тангаларнинг тескари томонида Қозоғистон байроғи, «Нур-Султан» ёзуви, давлат раҳбарининг қароргоҳи — Оқ Ўрда ва пойтахтнинг диққатга сазовор жойлари: Байтерек ёдгорлиги, «Остона Опера» биноси, EKSPO миллий павильони, «Хон-Шатир» савдо-кўнгилочар маркази тасвирланган. Олтин компонентли қисмида Назарбоевнинг портрети тасвирланган.

Танганинг олд томонида Нуржол булвари ва «1000 тенге» ёзувини кўришингиз мумкин. Олтиндан ишланган қисмида Қозоғистон герби тасвирланган. Танга Қозоғистон зарбхонасида таркиби 16 граммли 999/1000 пробали олтин компонентига эга бўлган, оғирлиги 46,2 граммлик 925/1000 пробали кумушдан ясалган. Диаметри 50 миллиметрни ташкил қилади.

Коллексион тангалар сувенир қадоқларида сотилади ҳамда қозоқ, рус ва инглиз тилларида Миллий банкнинг рақамланган сифат сертификати билан таъминланади.

Кейинчалик Миллий банк тангалар сотувга чиқадиган санани маълум қилади. Улар бутун мамлакат бўйлаб тўлов учун ишлатилиши мумкин, шунингдек, банк ҳисобларига ўтказмалар, пул кўчириш ва банкларда алмаштиришда фойдаланиш мумкин.

Шунингдек, «Машҳур воқеалар ва шахслар» сериясида шоир ва ўқитувчи Абай Қўнонбоев ва Қозоғистон СССР халқ ёзувчиси Жубан Молдагалиев образлари билан ҳам тангалар зарб қилиняпти.

Маълумот учун, Нурсултан Назарбоев 1990 йилдан 2019 йилгача Қозоғистон президенти бўлган. 2020 йилнинг июль ойида у 80 ёшни қаршилади. Президентлик муддати тугаганидан кейин у «Нур Отан» партиясининг раиси, Қозоғистон конституциявий кенгаши аъзоси ва Хавфсизлик кенгаши раиси бўлди. Мамлакатнинг биринчи президенти ва миллат етакчиси (элбоши) сифатида Назарбоевга Хавфсизлик кенгашида умрбод раҳбарлик қилиш ҳуқуқи «Қозоғистон Республикаси Хавфсизлик кенгаши тўғрисида»ги қонун томонидан берилган.

Аввалроқ Канадада мамлакат аҳолисини оғир дамларда керакли нарсалар билан таъминлаётган волонтёрлар, озиқ-овқат дўконлари сотувчилари, шифокорлар, тиббиёт ходимлари ва бошқа ходимлар шарафига махсус танга зарб қилгани ҳақида хабар берилган эди.