Россияда меҳнат етишмовчилиги кучайгани боис, минглаб шимолий кореялик ишчилар уруш шароитида оғир ва машаққатли ишга жалб қилинаётгани маълум бўлди. Бу ҳақда BBC нашри махсус суриштирув ўтказди.
Жанубий Корея разведкаси маълумотларига кўра, Москва фронтга кетган ёки мамлакатдан чиқиб кетган эркаклар ўрнини тўлдириш учун тобора кўпроқ Шимолий Корея фуқароларидан фойдаланмоқда. 2024 йилда Россияга 13 мингдан ортиқ шимолий кореялик кириб келган, бу 2023 йилга нисбатан 12 баробар кўп дегани. Уларнинг катта қисми “талаба визаси” билан кирган, аммо улар амалда қурилиш, тикувчилик ва IT соҳасида ишлашмоқда. Ишчиларнинг айтишича, улар кунига 18-20 соатлаб ишлашга мажбурланади, йилига атиги 2 кун дам олади.
“Ҳар куни уйғониб, яна шундай оғир кунни бошдан кечириш даҳшат”, дейди Таэ исмли собиқ ишчи.
Баъзилар уйғонганида қўллари ишламай қолганини, иш жараёнида ҳушидан кетиб, усталар томонидан калтакланганини билдирган. Таъкидланишича Россияда яшаш шароити ҳам жуда оғир: кўпчилик ифлос ва одамга тўла контейнерларда ёки тугалланмаган биноларда совуқдан ҳимояланиш учун фақат брезент билан ёпилган эшиклар ортида тунайди. Жароҳатланганлар ҳам касалхонага юборилмайди.
Ишчиларнинг катта қисми маошларини кўрмайди — ойликларининг асосий қисми “садоқат тўлови” сифатида Пхеньянга юборилади, қолган кичик сумма (100, 200 доллар) эса улар ватанга қайтгач берилади. Бу уларнинг қочиб кетишига тўсқинлик қилиш мақсадида қилинмоқда. BBC’га интервью берган Жин исмли ишчи бошқаларнинг уларни “қул” деб масхара қилганини айтиб берди.
“Бизга одам эмаслигимизни, фақатгина гапирадиган машиналар эканимизни айтишарди”, деди у.
Мутахассисларнинг фикрича, Ким Чен Ин ва Владимир Путин ўртасидаги ҳамкорлик натижасида бу ишчилар оқими уруш тугаганидан кейин ҳам давом этиши мумкин. 2025 йилда Пхеньян Москвага яна 50 мингдан ортиқ ишчи юборишни режалаштирмоқда.
Изоҳ (0)