31 март куни Қозоғистоннинг Туркистон шаҳрида Туркий тилли давлатлар ҳамкорлик кенгашининг норасмий саммити бўлиб ўтади, деб хабар беради «Дунё» агентлиги.
Саммит Қозоғистоннинг биринчи президенти Нурсултон Назарбоев ташаббуси билан чақирилмоқда. Унда Туркий тилли давлатлар ҳамкорлик кенгашига аъзо-давлатларнинг барча раҳбарлари ва ташкилот кузатувчиси мақомида бўлган Венгриянинг бош вазири иштирок этишини тасдиқлаган.
Саммит якуни бўйича Туркистон шаҳрини Турк оламининг маънавий пойтахти дея эълон қилиш борасидаги декларацияларни имзолаш режалаштирилган.
Маълумот учун, Туркий тилли давлатлар ҳамкорлик кенгаши 2009 йил 3 октябрда Озарбайжоннинг Нахичеван шаҳрида тузилган бўлиб, дастлаб унга Туркия, Озарбайжон, Қозоғистон ва Қирғизистон аъзо эди. Шавкат Мирзиёев 2018 йил 3 сентябрь куни Қирғизистоннинг Чўлпонота шаҳрида бўлиб ўтган саммитда фахрий меҳмон сифатида иштирок этган. 2019 йилнинг октябрида эса Ўзбекистон Туркий тилли давлатлар ҳамкорлик кенгаши саммитида илк бор тўла ҳуқуқли аъзо сифатида иштирок этганди.
Аввалроқ Шавкат Мирзиёев Туркия ташқи ишлар вазири Мавлуд Чавушўғли билан Туркий тилли давлатлар ҳамкорлик кенгаши доирасидаги ҳамкорлик масалалари юзасидан фикр алмашган эди.