16 март куни Олий судда бўлиб ўтган матбуот анжуманида Олий суд судьяси Абдувоҳид Қосимов судьяларнинг ойлик маоши тўғрисидаги саволларга жавоб берди, деб ёзади Repost.
«Ўзбекистонда 1300 дан ортиқ судья бор. Маошимиз қанча экани ҳеч кимга сир эмас, бироқ у битта оилани боқишга етади. Ўйлашимизча, буни очиқлаш шарт эмас», — дейди Қосимов.
У маошининг миқдорини очиқлашни истамагани, жамиятда юзага келиши мумкин бўлган танқидий муҳокамаларнинг олдини олиш хоҳиши билан изоҳлаган.
« ‘Шунча ойлик олгани учун афтидан, коррупцияга йўл қўйган’ ёки ‘шунча маош олишига қарамай, нимага барибир коррупция билан шуғулланмоқда’ қабилидаги танқидий фикрларнинг олдини олиш нуқтаи назаридан судьялар маоши очиқланмаслиги керак деб ҳисоблаймиз. Худога шукур маошимиз оиламизни боқишга етяпти», — дейди Олий суд судьяси.
Эслатиб ўтамиз, 2019 йилнинг декабрида Олий суд судьяси Иброҳим Тожиев Олий судда фаолият юритаётган судьяларнинг ўртача ойлик иш ҳақи 5 миллион сўмдан 8 миллион сўмгача етишини маълум қилганди.
2020 йилнинг июлида эса Олий суди раиси ўринбосари Холмўмин Ёдгоров БМТнинг махсус маърузачиси Диего Гарсия-Саяннинг Ўзбекистон судьялари мустақил эмаслиги ҳақидаги фикрларига муносабат билдириб, олиб борилган қисқа вақтдаги ислоҳотлар натижасида судьяларга тўлиқ шароит – юқори ойлик, иш шароити, хизмат автомашиналари яратилганини айтганди. «Энг асосий мезонлардан бири – беш йил яхши ишласа 10 йил, 10 йиллик муддатдан ҳам ўтганидан кейин чекланмаган муддатга ишга тайинлагандан кейин, юқори ойлик берилганидан кейин, бирорта идора судни ишига аралашмасин, деб маъмурий ва жиноий жавобгарлик белгилаб қўйилгандан кейин, билмадим, қайси маънода судьяларнинг ҳали мустақил эмаслиги айтилган», — деган эди у.
Изоҳ (0)