Шимолий Корея етакчиси Ким Чен Иннинг синглиси, Корея Меҳнат партияси (КМП) Сиёсий бюроси аъзоси Ким Ё Чжон Жанубий Корея ва АҚШнинг қўшма ҳарбий машғулотлари муносабати билан КХДРнинг Ватанни тинч йўл билан бирлаштириш бўйича тузилган қўмитани тугатиш масаласини кўтариб, Сеул билан тузилган тинчлик битимидан бош тортиши ҳақида таҳдид қилди. Бу ҳақда «Интерфакс» хабар берди.
«Шу пайтгача биз ватандошларга қаратилган қўшма ҳарбий машғулотларнинг ўзига қарши эдик ... Биз буни бир неча бор таъкидладик, сабр-тоқат кўрсатдик ва ҳатто барча имкониятларни бердик. Шунга қарамай, Жанубий Корея расмийлари бутун халқ олдида яна ‘илиқ март ойи’ни эмас, балки ‘урушли март ойи’ни танлади», — дейилган Ким Ё Чжоннинг Корея Марказий телеграф агентлиги томонидан эълон қилинган баёнотида.
У ҳарбий машғулотлар ва музокаралар бир-бирига мос келмаслигини таъкидлаган. «Жануб билан мулоқот қилиш учун тузилган Ватанни тинч йўл билан бирлаштириш қўмитаси — ҳозирги вазиятда энди кераги бўлмай қолган ташкилотни тугатиш масаласини кўтаришимизга тўғри келади», — деган Шимолий Корея раҳбарининг синглиси.
Унинг сўзларига кўра, КХДР Кимган тоғи халқаро туризм бюросини тарқатиб юбориш ҳақида ҳам ўйлаб кўради.
«Биз келажакда Жанубий Кореянинг муносабати ва хатти-ҳаракатларини кузатиб борамиз ва агар у ҳаддидан ошаверса, кореялараро ҳарбий келишувдан жасорат билан воз кечиш каби ноодатий чораларни кўришимиз мумкин», — деган Ким Ё Чжон. Бундан ташқари, у АҚШ президенти Жо Байден маъмуриятини яқин тўрт йил ичида бемалол ухлашимга тўсқинлик қиладиган ҳеч нарса қилмагани яхшироқ, деб огоҳлантирган.
Бу Шимолий Кореянинг Байден маъмуриятига президент инаугурациядан кейинги биринчи мурожаатидир. Бу ҳақда АҚШ давлат котиби Энтони Блинкен ва мудофаа вазири Ллойд Остиннинг ушбу ҳафтада режалаштирилган Жанубий Кореяга сафари олдидан маълум қилинди. Сеулда Блинкен ва Остин билан ўтказиладиган мунозараларнинг бош мавзуларидан бири КХДР бўлиши кутилмоқда.
Аввалроқ Оқ уй февраль ўрталаридан буён бир нечта дипломатик каналлар, шу жумладан, Нью-Йоркдаги каналлар орқали Пхеньян билан боғланишга уриниб келгани, аммо Шимолий Корея раҳбарияти бу уринишларни эътиборсиз қолдирганини айтган эди.
Жанубий Корея ва Қўшма Штатлар ўтган ҳафтанинг бошида коронавирус ҳолатини ҳисобга олган ҳолда «минимал даражадаги қўшин» иштирокидаги баҳорги қўшма ҳарбий машғулотларни бошлаган. Машғулотлар 18 мартгача давом этади. Шимол анчадан буён иттифоқчилар ўртасидаги қўшма ҳарбий машғулотларни тўхтатишни талаб қилиб келади ва машғулотларни босқинчилик учун тайёргарлик сифатида қоралайди.
2018 йил 19 сентябрда имзоланган Кореялараро ҳарбий келишувга мувофиқ, икки Корея кескинликни камайтириш бўйича чора-тадбирлар мажмуини муҳокама қилиш ва амалга оширилишини назорат қилиш учун қўшма ҳарбий маслаҳат органини тузишга келишиб олган эди.
Кореялараро муносабатлар 2019 йил бошида АҚШ ва Шимолий Корея саммити КХДРни ядросизлантириш тўғрисидаги якунига етмаган келишувидан кейин тўхтаб қолди. Натижада Шимолий ва Жанубий Корея ўртасидаги муносабатлар фақат ёмонлашиб борди. 2020 йил июнь ойида КХДР ҳукумати Сеул билан барча мавжуд алоқа каналлари орқали алоқаларни тўхтатганини эълон қилди. Кейинчалик қуролсизлантириш зонаси яқинидаги Кесонг технопаркидаги Кореялараро алоқалар бўйича идоранинг портлатилгани ҳақида хабар берилди. КХДР маъмурияти ўзларининг қарори билан бино вайрон бўлганини тасдиқлаган.
Изоҳ (0)