Исроил 16 мартдан бошлаб барча мамлакатлар билан икки томонлама авиақатновларни тиклайди. Бу ҳақда мамлакат ТИВ матбуот хизматига таяниб, «РБК» хабар берди.
«Эртадан бошлаб Исроилга бориш ва келиш йўловчи авиақатновлари йўналишидаги чекловлар бекор қилинади», — дейилади вазирлик баёнотида.
Бироқ бир қатор чекловлар ўз кучида қолади, жумладан, келаётган рейслар сони кунига 3 минг кишилик квотага мувофиқ чекланади, аэропортда ижтимоий масофани сақлаш қоидалари сақлаб қолинади ва йўловчилар коронавирус инфекцияси бўйича текширувдан ўтказилади. Бундан ташқари, Исроил Соғлиқни сақлаш вазирлиги аҳоли соғлиғига зарар етказиши мумкин бўлган ҳар қандай парвозни бекор қилиш ҳуқуқини ўзида сақлаб қолди.
Аввалроқ оммавий вакцинация муносабати билан Исроил коронавирус юзасидан ўрнатилган чекловларни юмшатган эди. Шу тарзда 8 мартдан бошлаб айрим тоифадаги чет элликларга мамлакатга кириш учун рухсат берилди ва исроилликларнинг уйига қайтиши учун қўйилган тақиқлар ҳам бекор қилинди.
Исроил коронавирусга қарши эмлаш бўйича дунёда етакчи ҳисобланади. Bloomberg маълумотига кўра, мамлакат аҳолиси 9,2 миллион дозада эмланган ва ўртача 100 аҳолига 102,63 доза вакцина тўғри келади. Таққослаш учун, Қўшма Штатларда ҳар 100 кишига 32,25, Россияда эса 5,11 дозадан вакцина тўғри келади.
Аввалроқ COVID-19’га қарши тезкор ва самарали эмлаш кампанияси шарофати билан Исроил дунёда вирусни енгган биринчи мамлакатга айлангани ҳақида хабар берилганди.
Шунингдек, Бирлашган Араб Амирликлари (БАА) коронавирусга қарши оммавий иммунитетга эришган биринчи мамлакат бўлиши мумкинлиги, чунки аҳолининг катта қисми вирусга қарши эмланиб бўлгани маълум қилинган.
Изоҳ (0)