Германия COVID-19 коронавирус инфекциясига қарши AstraZeneca вакцинасидан фойдаланишни вақтинча тўхтатди, Италияда эса мазкур вакцина билан эмланганлардан бири вафот этганидан кейин препаратнинг партиясидан фойдаланишга тақиқ қўйилди. Шунингдек, Францияда ҳам мамлакат президенти Эммануэль Макрон AstraZeneca вакцинасидан фойдаланиш тўхтатилганини эълон қилган.
Германия соғлиқни сақлаш вазирлиги 15 март куни эҳтиёт чораси сифатида AstraZeneca вакцинаси билан одамларни эмлаш ишлари вақтинча тўхтатиб турилганини маълум қилди.
«Германия Федератив Республикаси ҳукумати Паул Эрлих номидаги институт тавсияларига амал қилишни лозим деб топди», – дейилади вазирлик баёнотида.
Германия асосий тиббиёт муассасаси препаратни қўллаш билан боғлиқ қарши кўрсатмалар, ножўя таъсирлар юзасидан қўшимча тадқиқотлар ўтказиш зарурлигини билдирган.
Италияда ҳам Пемонт провинциясининг ҳукумати 57 ёшли мусиқа ўқитувчиси Сандро Тогнаттининг эмлашдан кейинги ножўя таъсирлар оқибатида вафот этганидан кейин дастлаб вакцинадан фойдаланишни вақтинча чеклаган ва кейинчалик препаратни ишлатишни тўхтатган эди, деб ёзмоқда Reuters.
Италия шимолидаги Пемонт ҳудуди прокурорлари эмлашдан бир неча соат ўтгач, одам ўлими билан боғлиқ ҳодиса кузатилганини инобатга олган ҳолда AstraZeneca вакцинасининг 393 600 бирликдаги дозаси мусодара қилингани ҳақида хабар берган.
Кейинчалик Италиянинг асосий ваколатли тиббиёт маркази ҳам мамлакатда мазкур вакцинадан фойдаланишни тўхтатишни тавсия этган.
Франция президенти Эммануэль Макрон ҳам Германия ва Италиядаги каби вакцина билан аҳолини эмлаш ишларини тўхтатиш ҳақида қарор чиқарган.
Испанияда ҳам аҳолини COVID-19 коронавирус инфекциясига қарши AstraZeneca вакцинаси билан эмлаш ишлари 15 суткага тўхтатилди. Бу ҳақда маҳаллий АБC нашри хабар тарқатган.
Нидерландия ҳамда Ирландияда ҳам Европа Иттифоқига аъзо бошқа давлатлар каби AstraZeneca’дан фойдаланиш тўхтатиб қўйилган.
Бунга қадар Норвегия, Дания, Австрия, Болгария ва ЕИнинг бошқа мамлакатлари препарат қабул қилинганидан кейин инсон томирларида тромблар юзага келаётганини инобатга олган ҳолда AstraZeneca вакцинаси билан аҳолини эмлаш ишларини тўхтатган эди. Ўз навбатида вакцина ишлаб чиқарувчиси бўлган компания препаратнинг инсонлар саломатлиги учун зарарли эмаслигини маълум қилган.
Изоҳ (0)