Қозоғистон пойтахтида 18 мартдан карантин чоралари кучайтирилади, Наврўз куни эса локдаун эълон қилинади

Қозоғистон пойтахти Нур-Султонда 18 мартдан чеклов ва карантин чоралари кучайтирилади, деб хабар бермоқда Tengrinews. Шаҳар бош давлат санитар шифокори Сархат Бейсенова тегишли қарорни имзолаган.

Оммавий тадбирлар, шу жумладан, оилавий маросимлар ва маъракалар, шунингдек, уйда ташкиллаштириладиган зиёфатлар, тўйлар, юбилейлар, маъракаларни ўтказиш ва уларда қатнашиш, бундан ташқари, байрам корпоративлари, митинглар, намойишлар, йиғинлар ташкиллаштириш ва ўтказиш тақиқланди.

Фаолияти тикланмаган объектлар: боулинг марказлари, компьютер клублари (Ashyq синов лойиҳасида қатнашаётган объектлардан ташқари), кинотеатрлар, кинорумлар, билярдхоналар, караоке, батутлар, тунги клублар, букмекерлик идоралари ва ўйин клублари, ёпиқ иншоотлардаги ўйин майдонлари ва аттракционлар, муз ва ролик яхмалаклари (спорт объектларидагидан ташқари)га бориш тақиқланади.

Ashyq синов лойиҳасида қатнашаётган тадбиркорлик объектларига кириш учун Ashyq мобил дастуридан фойдаланиш зарур, уни App Store ва Play Market дўконларидан юклаб олиш мумкин.

Жамоат жойларига, шу жумладан, шаҳар жамоат транспорти ҳамда фаолиятига рухсат берилган объектларга ташриф буюрганда, шунингдек, очиқ ҳаводаги жамоат жойларида бўлган вақтда ниқоб тақиш, масофа сақлаш ва антисептиклардан фойдаланиш талабларига қатъий риоя қилиш шарт.

Ҳужжат 2021 йил 18 март кунидан кучга киради.

21 март куни эса Нур-Султонда локдаун эълон қилинди. «Нур-Султон ‘қизил’ зонада эканини ҳисобга олиб, дам олиш куни — 21 март (якшанба)да шаҳарда локдаун жорий қилинади. Шу куни савдо марказлари, ёпиқ ноозиқ-овқат бозорлари, ёпиқ спорт объектларининг ишлаши тақиқланади.

Шунингдек, якшанба куни жамоат транспорти ҳаракати ҳам тўхтатилади: дезинфекция ишлари олиб борилади.

«Шаҳардаги эпидемиологик вазият беқарор. Ўтган байрам кунлари коронавирус кўрсаткичлари ҳар куни ўсганини кўрсарди. Наврўз байрами муносабати билан оммавий тадбирлар ўтказиш тақиқланади. Ўсиш давом этишига йўл қўйиб бўлмайди», — деди Нур-Султон бош санитар шифокори Сархат Бейсенова.

Қозоғистонда ўтган бир кеча-кундузда 954 кишида коронавирус аниқланган, шуларнинг 297 нафари Олмаота, 127 нафари Нур-Султонда қайд этилган. Мамлакатда касалланганларнинг умумий сони 225 685 кишига етди.

Аввалроқ Қозоғистонда Наврўз байрамини 10 кун нишонлаш таклиф этилган, Наврўз байрамини нишонлаш концепциясини тасдиқлаш тўғрисида қарор лойиҳаси жамоатчилик муҳокамаси учун эълон қилинган эди.