Францияда COVID-19’нинг янги штамми рўйхатга олинди. Лекин унинг юқумлилик ва хавфлилик даражаси юқорироқ эканлиги ҳақида ҳали маълумот йўқ. Бу ҳақда Франция Соғлиқни сақлаш вазирлигининг баёнотига таяниб «Korrespondent.net» хабар берди.
Вазирликнинг маълумот беришича, коронавируснинг янги варианти Бретан вилоятининг Ланьон шаҳридаги касалхонанинг бир гуруҳ беморларида аниқланди.
Le Point нашрининг ёзишича, соғлиқни сақлаш идоралари ушбу мутацияни тадқиқ қилиниши керак бўлган тоифага киритди. Ланьон шаҳрида саккиз кишининг организмида коронавируснинг янги штамми аниқланди. У оқсилларни кодлаш қисмида тўққизта мутацияга эга.
Бу штаммни оддий тестлар ёрдамида аниқлашнинг иложи йўқ — ушбу штаммни юқтирганларда касаллик аломатлари бўлган, лекин суртмалар салбий натижаларни кўрсатган. Ушбу турдаги вирусни юқтирганликни аниқлаш учун зардобли қон текшируви зарур бўлиши мумкин.
Ҳозир шифокорлар ушбу штамм ва унинг таъсирини яхшироқ тушуниш учун чуқур тадқиқотлар олиб бормоқда. Шунингдек, мутациянинг вакциналар ва антитаналарга реакциясини текшириб кўриш керак.
Аввалроқ Финляндияда коронавируснинг янги мутацияси аниқланди. Жанубий Финляндияда аниқланган коронавирус намунасида SARS-CoV-2 вирусининг илгари номаълум вариантига дуч келинган.
Шунингдек, Норвегияда коронавируснинг В.1.525 номли штамми аниқланди. Бу одатий COVID-19’дан анча хавфлироқ бўлиши мумкин.
Бундан ташқари, Британияда коронавируснинг «хавотирлироқ» тури ва Калифорнияда коронавируснинг бутунлай янги штамми қайд этилди.
Изоҳ (0)