Швеция AstraZeneca швед-инглиз компанияси томонидан ишлаб чиқарилган коронавирусга қарши вакцинанинг иккиламчи таъсирига ойдинлик киритилмагунча эҳтиёт чораси сифатида препаратдан фойдаланишни тўхтатди. Бу ҳақда Швеция Соғлиқни сақлаш агентлигига таяниб «РБК» хабар берди.
Хабарга кўра, препаратни қўллаш Европанинг Дори-дармон агентлиги (EMA) томонидан вакцинациядан сўнг юзага келиши мумкин бўлган ножўя таъсирлар текширилгунга қадар тўхтатиб турилади. EMA текшируви давомида эмланганларнинг қонида тромб пайдо бўлиши ҳолатлари эмлаш билан боғлиқ ёки йўқлигини аниқлаш режалаштирилган. «EMA мазкур ҳолатларнинг эмлаш билан қанчалик боғлиқлигини аниқламагунча вакцинацияни тўхтатиб туриш муҳимдир», — деди давлат эпидемиологи Андерс Тегнелл.
Швед компаниясининг таъкидлашича, AstraZeneca вакцинаси коронавирусдан самарали ҳимоя қилади, қабул қилинган умумий дозалар миқдори эса 17 миллионтага тенг. Швециянинг ўзида препаратнинг ножўя таъсири қайд этилмаган.
Аввалроқ кўплаб Европа мамлакатлари AstraZeneca вакцинасидан фойдаланишни тўлиқ ёки қисман тўхтатгани ҳақида эълон қилган, хусусан, Германия, Франция, Италия, Испания, Словения, Португалия, Кипр, Нидерландия, Австрия, Дания, Эстония, Латвия, Литва, Болгария, Ирландия, Люксембург, Норвегия ва Исландия, шунингдек, Европадан ташқаридаги Индонезия, Конго, Таиланд ва Жанубий Африка мамлакатларида мазкур вакцинадан фойдаланиш тўхтатилган.
Жаҳон соғлиқни сақлаш ташкилоти (ЖССТ) бош директори Тедрос Гебрейесуснинг айтишича, ташкилотнинг вакциналар хавфсизлиги бўйича маслаҳат қўмитаси 16 март куни AstraZeneca препарати хавфсизлигини кўриб чиқади.
Эслатиб ўтамиз, коронавирусга қарши AZD1222 вакцинаси Буюк Британия (Оксфорд университети) ва Швеция (AstraZeneca) олимлари томонидан биргаликда ишлаб чиқилган. 2020 йил ноябргача AstraZeneca препаратнинг икки дозаси билан эмланган кишиларда вакцина 70 фоиз самарадорлик кўрсатгани ва биринчи дозадан сўнг 14 кун ичида танада иммунитет ҳосил бўлгани ҳақида хабар қилган. Компания вакцинанинг жиддий иккиламчи таъсири йўқлигини айтган. Шу билан бирга, вакцинани синовдан ўтказишда иштирок этгаётганлардан бири вафот этгани сабабли препаратни дастлабки ўрганиш вақтинча тўхтаган. Бироқ кейинчалик шифокорлар унинг ўлими эмлаш билан боғлиқ эмас ва вакцина синови хавфсиз ўтган, деган хулосага келган.
Оммавий эмлашлар бошлангандан сўнг вакцинани қабул қилганлар орасида касалхонага ётқизиш ва ўлим ҳолатлари кузатила бошлади. Ўлим ҳолатини ўрганган шифокорлар ушбу дори билан эмланганларда қон тромблари ҳосил бўлганини аниқлади.
Ўз навбатида, фармацевтика компанияси қон тромблари ва эмлаш ўртасида боғлиқлик мавжудлигига оид далиллар йўқлигини айтди. AstraZeneca маълумотларига кўра, Европа Иттифоқи ва Буюк Британияда 17 миллион эмланганлар орасида 15 та чуқур қон тромби ва 22 та ўпка эмболия ҳолати аниқланган.
Изоҳ (0)