Беларусь президенти Александр Лукашенко интернетда жойлаштирилган унинг ҳашаматли ҳаёти ва бойликка интилиши ҳақидаги фильмни ёлғон, уйдирма деб атади. Бу ҳақда президент 13 март куни журналистлар билан бўлган учрашувда гапирди, деб хабар берди «ТАСС».
«Мен учун энг ёмони — сизнинг олдингизда изза бўлишимдир. Мен ҳеч қачон айтмаган ишимни қилмайман. Айтдимми, демак бажаришим керак. Шунинг учун излашнинг кераги йўқ», — деди Лукашенко. Унинг фикрига кўра, мухолифат бекордан бекор бу масала ортидан тушган. «Энди бу иш бутунлай ўринсиз. Бундан ташқари, улар менга ҳеч қандай алоқаси бўлмаган аниқ фамилияларни келтирмоқда, сизга қасам ичаман», — деб таъкидлади президент.
Лукашенко фильмни ҳали кўрмаганини айтди. «Ҳаракат қиламан. Айтишларича, катта фильм экан. Бундай фильмларни кўргани вақтим йўқ. Менга фақат таҳлил блоклари берилди. Мен ҳам бу ерда янги нарса йўқ, деган хулосага келдим», — деб тушунтириш берди Лукашенко. У айтилган жойларда ҳеч қандай ҳашамат йўқлигини таъкидлади. Мисол тариқасида у Припять дарёси бўйидаги уйини (Гомель вилояти) келтирди. «У ерда президент истиқомат қиладиган дам олиш маскани ва ёғоч уй бор. Бир қисми оммавий. Катта умумий зал. Менинг ётоқхонам ва болалар хонаси. Бўлди. Нима бу, саройми? Ахир у меники эмас-ку. Давлатники-ку!», — деди Лукашенко.
Президент фильмда кўринган соатлар ҳақида ҳам гапирди: «У соатларга 15 йилдан ҳам ошгандир, эҳтимол. Сизларга очиқ айтаман, улар безовта бўлмай қўяверсин, бу соатни менга Нурсултон Абишевич Назарбоев совға қилган», — деди у.
Совғалар ҳақида гапирар экан, Лукашенко аввал уларни Мустақиллик саройидаги музейда намойиш этилишини буюрганини айтди. «У ерда бизнинг ‘Луч’ соатларимиздан тортиб, мана шундай соатларгача бор. Мухолифатчилар хавотир олмасин, бу соатларнинг ҳаққини кимдир тўлаган. Нархларини бўлса, кўрдингиз. Улар нархини 10-15 баробар ошириб юборган ва мени тиллага ўч деб атаган», — деди президент. «Ортиқча ҳашамга менинг тоқатим йўқ», — деб таъкидлади у.
Лукашенконинг эслатиб ўтишича, унинг ихтиёрида фавқулодда вазиятлар учун молиявий захира фонди мавжуд. «Мен пулларни пандемияга қарши кураш учун сарфлаяпман — шифокорларнинг маоши, дори-дармон ва ҳоказолар учун. Бу харажатлар давлат бюджетида режалаштирилмаган. Мен ҳеч қачон бошқалардан нимадир ўғирламайман. Ва ҳар бир рублнинг қадрини жуда яхши биламан», — деди Лукашенко.
Аввалроқ интернетда деярли бир ярим соатлик фильм эълон қилинган. Унда маъмуриятдаги коррупция, мамлакат президенти эга бўлган ҳашамат ҳақида айтилган. Ҳозирги вақтгача фильм 4 миллион мартадан ортиқ томоша қилинган.
Аввалроқ Беларусда бўлиб ўтган президентлик сайловида ўз номзоди билан қатнашган мухолифатчи Светлана Тихановская мамлакатда ҳокимият йил охиригача ўзгаришини айтган эди.
Изоҳ (0)