Россия Давлат Думаси депутатлари Александр Хинштейн ва Елена Ямпольская Иккинчи Жаҳон уруши даврида СССРда нашр этилган босма материалларни кутубхонлар томонидан йўқ қилинишини тақиқловчи қонун лойиҳасини тайёрлади. Бу ҳақда Хинштейн ўзининг Telegram каналида маълум қилди, деб ёзади Meduza.
«Бир бемаъни ишдан хабар топдим. Маълум бўлишича, Иккинчи Жаҳон уруши даврида СССРда нашр этилган китоблар, газеталар, журналлар, варақалар, плакатлар ва бошқа босма материаллар ҳеч қандай тарзда давлат томонидан ҳимоя қилинмайди, ваҳоланки, булар энг муҳим тарихий ҳужжатлар, шунингдек, буюк давр қаҳрамонликлари ва фожиасидан далил ҳисобланади. Бугун кутубхоналарнинг уларни ҳисобдан чиқариши, ташлаб юбориши, ёқиб юбориши, макулатура сифатида топширишига йўл қўйилмоқда» — дейилади депутатнинг Telegram постида.
Хинштейн, шунингдек, каналда қонун лойиҳасинининг ўзини ҳам эълон қилди. Унда кутубхоначилик иши тўғрисидаги қонунга ҳар қандай мулк шаклидаги кутубхоналарга 1939 йил 1 сентябрдан 1945 йил 2 сентябргача СССРда яратилган ва 1947 йилгача биринчи марта нашр этилган «босма нашрларни, бошқа ҳар қандай ҳужжатларни» ҳисобдан чиқаришни тақиқловчи бандни қўшиш таклиф этилади.
Давлат Думасининг маълумотлар базасида ҳали қонун лойиҳаси мавжуд эмас. Хинштейннинг маълум қилишича, ҳужжат 12 март куни Давлат Думасига тақдим этилади.
Депутатнинг таъкидлашича, Иккинчи Жаҳон урушига оид ҳужжатларни йўқ бўлиб кетишдан ҳимоя қилиш ташаббуси дастлаб илмий ва тарихий жамоатчилик томонидан кўтарилган бўлиб, Россия давлат гуманитар университети ректори депутатга бу масалада тегишли мурожаат юборган.
Изоҳ (0)