Belarus prezidenti Aleksandr Lukashenko internetda joylashtirilgan uning hashamatli hayoti va boylikka intilishi haqidagi filmni yolg‘on, uydirma deb atadi. Bu haqda prezident 13-mart kuni jurnalistlar bilan bo‘lgan uchrashuvda gapirdi, deb xabar berdi “TASS”.
“Men uchun eng yomoni — sizning oldingizda izza bo‘lishimdir. Men hech qachon aytmagan ishimni qilmayman. Aytdimmi, demak bajarishim kerak. Shuning uchun izlashning keragi yo‘q”, — dedi Lukashenko. Uning fikriga ko‘ra, muxolifat bekordan bekor bu masala ortidan tushgan. “Endi bu ish butunlay o‘rinsiz. Bundan tashqari, ular menga hech qanday aloqasi bo‘lmagan aniq familiyalarni keltirmoqda, sizga qasam ichaman”, — deb ta’kidladi prezident.
Lukashenko filmni hali ko‘rmaganini aytdi. “Harakat qilaman. Aytishlaricha, katta film ekan. Bunday filmlarni ko‘rgani vaqtim yo‘q. Menga faqat tahlil bloklari berildi. Men ham bu yerda yangi narsa yo‘q, degan xulosaga keldim”, — deb tushuntirish berdi Lukashenko. U aytilgan joylarda hech qanday hashamat yo‘qligini ta’kidladi. Misol tariqasida u Pripyat daryosi bo‘yidagi uyini (Gomel viloyati) keltirdi. “U yerda prezident istiqomat qiladigan dam olish maskani va yog‘och uy bor. Bir qismi ommaviy. Katta umumiy zal. Mening yotoqxonam va bolalar xonasi. Bo‘ldi. Nima bu, saroymi? Axir u meniki emas-ku. Davlatniki-ku!”, — dedi Lukashenko.
Prezident filmda ko‘ringan soatlar haqida ham gapirdi: “U soatlarga 15 yildan ham oshgandir, ehtimol. Sizlarga ochiq aytaman, ular bezovta bo‘lmay qo‘yaversin, bu soatni menga Nursulton Abishevich Nazarboyev sovg‘a qilgan”, — dedi u.
Sovg‘alar haqida gapirar ekan, Lukashenko avval ularni Mustaqillik saroyidagi muzeyda namoyish etilishini buyurganini aytdi. “U yerda bizning ‘Luch’ soatlarimizdan tortib, mana shunday soatlargacha bor. Muxolifatchilar xavotir olmasin, bu soatlarning haqqini kimdir to‘lagan. Narxlarini bo‘lsa, ko‘rdingiz. Ular narxini 10-15 barobar oshirib yuborgan va meni tillaga o‘ch deb atagan”, — dedi prezident. “Ortiqcha hashamga mening toqatim yo‘q”, — deb ta’kidladi u.
Lukashenkoning eslatib o‘tishicha, uning ixtiyorida favqulodda vaziyatlar uchun moliyaviy zaxira fondi mavjud. “Men pullarni pandemiyaga qarshi kurash uchun sarflayapman — shifokorlarning maoshi, dori-darmon va hokazolar uchun. Bu xarajatlar davlat budjetida rejalashtirilmagan. Men hech qachon boshqalardan nimadir o‘g‘irlamayman. Va har bir rublning qadrini juda yaxshi bilaman”, — dedi Lukashenko.
Avvalroq internetda deyarli bir yarim soatlik film e’lon qilingan. Unda ma’muriyatdagi korrupsiya, mamlakat prezidenti ega bo‘lgan hashamat haqida aytilgan. Hozirgi vaqtgacha film 4 million martadan ortiq tomosha qilingan.
Avvalroq Belarusda bo‘lib o‘tgan prezidentlik saylovida o‘z nomzodi bilan qatnashgan muxolifatchi Svetlana Tixanovskaya mamlakatda hokimiyat yil oxirigacha o‘zgarishini aytgan edi.
Mavzuga doir:
Izoh (0)