Санитария-эпидемиологик осойишталик ва жамоат саломатлиги хизмати раҳбарининг ўринбосари Ботир Қурбонов коронавирусдан кейинги иммунитет ёки унга қарши вакцинадан қайси бири узоқроқ таъсир кўрсатиши борасидаги саволга жавоб берди.
Қурбоновнинг сўзларига кўра, инсонларда инфекция билан касалланиш натижасида табиий иммунитетнинг шаклланиши турлича — бу организмнинг ўзига хослигига боғлиқ.
«Мазкур вирус янги бўлгани сабаб ҳозирча аниқ жавобни бера олмаймиз. Мавжуд маълумотларга кўра, у дастлабки касалланишдан кейин 90 кунгача давом этиши мумкин.
Коронавирусга қарши вакцинанинг реал ҳаётга таъсири эса айни вақтда барча халқаро тадқиқот институтлари ва вакцина ишлаб чиқарувчилар томонидан ўрганилмоқда. Бир нарсани — вакцинациядан кейинги иммунитет давомийлигини ишонч билан айтиш мумкин: барча тадқиқотчиларнинг таъкидлашича, ушбу вакциналар эмланганидан сўнг бир йил давомида касалликка қарши иммунитет ҳосил қилади», — дейди Ботир Қурбонов.
Мавзуга доир: Ўзбекистон коронавирусга қарши 1 млн доза ZF-UZ-VAC 2001 хитой—ўзбек вакцинасини сотиб олиш бўйича келишувга эришди
Қорақалпоғистон Республикаси, вилоятлар ва Тошкент шаҳридаги даволаш профилактика муассасалари қошида 3138 та эмлаш хоналари ва 820 та мобил бригадалар ташкил этилган, улар барча эмлаш ишларини жадвал бўйича ва босқичма-босқич амалга оширади.
ЖССТ қўллашга рухсат берган Pfizer ҳамда BioNTech корхоналари томонидан ишлаб чиқилган вакцинани Ўзбекистонда ҳам эмлаш жараёнига жалб қилиш учун 100 минг дозага расман буюртма берилган. Февраль ўрталарида Ўзбекистонда коронавирусга қарши «Спутник V» вакцинасини қўллашга рухсат берилди.
Ботиржон Қурбонов ҳозирда Тошкентдаги Вирусология илмий-текшириш институти клиникасида Pfizer-BioNTech вакцинасини 70 даража совуқда сақлаш имконини берадиган музлатгичлар ҳозирлаб қўйилганини билдирган.
Изоҳ (0)