Тошкентда бир асрлик эман дарахти кесилишининг олди олинди

12 март куни ижтимоий тармоқларда Тошкентнинг Яшнобод туманидаги 300 йиллик эман кесилаётгани тўғрисида хабарлар тарқалди. Эълон қилинган суратлардан кўриш мумкинки, дарахтнинг бир нечта шохлари кесилган. Тошкент шаҳар экология бошқармаси мазкур вазиятга ўз муносабатини билдирди.

Бошқарма маълумотларига кўра, 9 март куни Тошкентнинг Яшнобод тумани ҳудудида ноқонуний дарахт кесилиши юзасидан ижтимоий тармоқлар орқали мурожаат келиб тушган. Вазиятга ойдинлик киритиш мақсадида бошқарма раҳбарияти томонидан тезкор ишчи гуруҳ тузилиб, мурожаатда қайд этилган манзилда батафсил ўрганиш ишлари олиб борилган.

«Олиб борилган дастлабки ўрганиш ишлари давомида туманнинг «Бойқўрғон» маҳалласи, Қамаши кўчасидаги 35-уйда яшовчи фуқаро Р.З. бир туп эман дарахтини буталагани аниқланди. Дастлабки суриштирув натижасида аниқланишича, ушбу ҳудуд Яшнобод тумани ҳокимининг тегишли қарори асосида бу фуқарога бириктирилган.

Ишчи гуруҳ томонидан ‘Ергеодезкадастр’ туман бўлимига қонунийлигини текшириш мақсадида саволнома юборилди. Маълумотнома тўлиқ олинмагунга қадар дарахтга тегмаслик юзасидан фуқародан кафолат хати олинганини маълум қиламиз», — дейилади хабарда.

Бошқарманинг таъкидлашича, «Давлат ўрмон фондига кирмайдиган ерларда дарахтлар ва буталардан фойдаланишни тартибга солиш ва улардан фойдаланиш соҳасида рухсат бериш тартибини янада такомиллаштириш тўғрисида»ги Вазирлар Маҳкамаси қарорининг 37-бандига биноан «юридик ёки жисмоний шахсларнинг мулки бўлган ва улар томонидан ёғоч-тахта ва ҳосил олиш учун экилган дарахтлар ва буталарни, шу жумладан, ипак қуртини боқиш мақсадида тут дарахти шохларини кесишга Давлат экология қўмитаси органларининг хулосаси талаб этилмайди».

«Gazeta.uz»нинг Экология ва атроф-муҳитни муҳофаза қилиш давлат қўмитасига таяниб ёзишича, мазкур эман дарахти тахминан 150 ёшда.

13 март куни Яшнобод туман ҳокими Бахтиёр Раҳмонқулов видеомурожаат билан чиқиш қилиб, «юз йиллик эманнинг ноқонуний кесилиши бутунлай тўхтатилганини» маълум қилди.