Марказий банкнинг Нақд пул муомаласи департаменти директори Фазлиддин Бозоров нақд пулларнинг ҳолати, улардан фойдаланиш, шунингдек, вақт ўтиб нақд кўринишдаги пулларнинг мутлақо муомаладан чиқиши мумкинлигига оид саволларга жавоб берди.
«Нақд пуллардан воз кечиб, ҳисоб-китобларни нақдсиз кўринишда амалга оширишга ўтишнинг афзалликлари кўп ва энг асосийси, иқтисодиётда пул айланиши тезлашади. Бундай жараён табиий равишда ҳамда ҳукуматнинг қўллаб-қувватлаши орқали аҳолига қийинчилик туғдирмаган ҳолда рўй бериши, босқичма-босқич жорий этилиши мақсадга мувофиқ ҳисобланади.
Масалан, дастлаб коммунал тўловларни фақат нақдсиз шаклда тўлаш, айрим йирик савдо ва умумий овқатланиш корхоналари томонидан тўловларни фақат банк карталари орқали қабул қилиш каби тартибларни жорий этиш секин-аста саволда қўйилган жараёнга етаклаши мумкин», — дейди у.
Маълум қилинишича, Швеция давлати нақд пуллардан воз кечиш сиёсатини 2015 йилда бошлаган бўлиб, бугунги кунда ушбу давлатда ресторанлар, дорихоналар ва савдо корхоналари тўлов учун нақд пулларни қабул қилишни рад этиш ҳуқуқига эга.
«Айрим оммавий ахборот воситаларида Нью-Йорк шаҳридаги бир қатор савдо корхоналари ва ресторанлар тўловларни фақат нақдсиз кўринишда қабул қилишни тажриба тариқасида қўллаб кўриши баъзи аҳоли вакилларининг эътирозларига сабаб бўлаётганини ёзмоқда.
Энди Ўзбекистон мисолида шу жараённи тасаввур қилиб, хулоса қилиб кўринг-чи, бунинг учун бизда етарли шарт-шароит мавжудми, аҳолининг дунёқараши шаклланганми? Оддийгина мисол, мамлакатда ойлик иш ҳақини ва пенсия тўловларини банк карталари орқали тўланишига эътироз билдирувчи фуқаролар кўплаб топилади», — дейди Бозоров.
Эслатиб ўтамиз, Марказий банк маълумотига кўра, 2021 йил январь ойида банклар орқали нақд пул айланмаси ҳажми 32,1 триллион сўмни ташкил этган.
Изоҳ (0)