Навоий вилоятининг Нурота туманида хотинига пичоқ ўқталиб, уни қўрқитмоқчи бўлган шахс қўлга олинди. Бу ҳақда «Дарё»га вилоят ИИБ ахборот хизмати раҳбари Ўктам Усмонов маълум қилди.
Маълум бўлишича, вилоятнинг Нурота туманида яшовчи 35 ёшли фуқаро А.Ш. хотини М.С. билан ҳар доим жанжаллашиб келган. Эр-хотин ўртасидаги низо кўплаб уруш-жанжалларга сабаб бўлган.
«Фуқаронинг хотини билан навбатдаги тортишуви турмуш ўртоғи фаолият юритувчи туман тиббиёт бирлашмасида содир бўлган. Эр турли шубҳа-гумон, асоссиз сабаблар билан жанжал кўтариб, хотини М.С.нинг ёнига келган ва унга пичоқ ўқталган. Шунингдек, унга тазйиқ ўтказиб, жанжал пайтида хотинига тан жароҳати ҳам етказган», — дейди Ўктам Усмонов.
Айтилишича, зўравон эр воқеа жойига етиб келган ИИБ ходимларига хотинига зарар етказиш нияти йўқлигини, уни шунчаки қўрқитиб қўймоқчилигини билдирган. Хотинига етказилган тан жароҳатини эса «сал пичоқ кесиб кетди», дея изоҳлаган.
Фуқаронинг хатти-ҳаракатларида жиноят аломатлари мавжудлиги боис Нурота туман ИИБ тергов бўлими томонидан фуқаро А.Ш.га нисбатан Жиноят кодексининг 112-моддаси (ўлдириш ёки зўрлик ишлатиш билан қўрқитиш) билан иш қўзғатилган. Ва суриштирув ишлари бошланган.
Қўшимча қилинишича, 16 йил бирга яшаган эр-хотин мазкур воқеадан сўнг ажрашишга қарор қилган.
Изоҳ (0)