Наманган шаҳридаги собиқ «Нотўқимачи» корхонасининг 7 қаватли биносида ёнғин содир бўлганда зудлик билан бартараф этиш ва жабрланувчиларни тезкор қутқаришга бағишланган амалий-тактик машғулот ўтказилди. Бу ҳақда «Дарё» мухбири Азизбек Абдувалиев хабар бермоқда.
Машғулот реал ҳолатга имкон борича яқинлаштириш мақсадида кечки пайт, соат 20:00 дан 22:00 гача бўлган вақт оралиғида ташкил этилди. Уни бошлаш учун буйруқ берилгач, куч ва воситалар шартли равишда фавқулодда вазиятга тенглаштирилган ҳолатни бартараф этиш ва жабрланувчиларни қутқаришга киришди. Ёнғин ўчириш гуруҳлари эса тезлик билан воқеа жойига етиб келди.
Ўқув машқи ёнғин содир бўлган бинодан одамларни эвакуация қилиш, ёнғинни ўчириш, жабрланганларга биринчи тиббий ёрдам кўрсатиш ва бошқа шу каби қутқарув тадбирларидан иборат бўлди. Фавқулодда вазият содир бўлган бино ва унинг атрофини ёритиш, қидирув-қутқарув ишларини олиб бориш, автонарвон орқали бинонинг юқори қаватларида қолиб кетган ишчи-хизматчилар ҳамда моддий бойликларни хавфсиз ҳудудга кўчириш ишлари амалга оширилди.
Ёнғинни бартараф этиш гуруҳлари томонидан «жабрланувчилар» нарвон ҳамда кўтаргич техникаси ёрдамида эвакувация қилинган бўлса, қутқарув гуруҳлари бу ишни махсус арқон ва анжомлар ёрдамида амалга оширди.
Машғулот давомида фавқулодда вазиятлар шароитида ихтисослаштирилган тузилмаларнинг тезкор ҳаракатлари ҳам амалда синаб кўрилди. Хусусан, вилоят ИИБ тезкор тергов гуруҳи, Йўл ҳаракати хавфсизлиги бошқармаси, Миллий гвардия, тиббиёт, электр, газ, сув таъминоти, авария хизмати ва бошқа корхона-ташкилот ходимлари ўқув машқида иштирок этди.
Вилоят ФВБ матбуот хизмати раҳбари Қаҳрамон Саттаровнинг билдиришича, тезкор тадбирга 23 та махсус техника жалб этилди. 30 нафардан ортиқ «жабрланувчи»га ёрдам кўрсатилди, улар орасида аёллар ҳам бор эди.
Маълумот учун, Наманган вилоятида 2020 йил давомида 797 та ёнғин содир бўлди. Улар оқибатида 5 киши ҳалок бўлган, 15 киши тан жароҳати олган.
Изоҳ (0)