Namangan shahridagi sobiq “Noto‘qimachi” korxonasining 7 qavatli binosida yong‘in sodir bo‘lganda zudlik bilan bartaraf etish va jabrlanuvchilarni tezkor qutqarishga bag‘ishlangan amaliy-taktik mashg‘ulot o‘tkazildi. Bu haqda “Daryo” muxbiri Azizbek Abduvaliyev xabar bermoqda.
Mashg‘ulot real holatga imkon boricha yaqinlashtirish maqsadida kechki payt, soat 20:00 dan 22:00 gacha bo‘lgan vaqt oralig‘ida tashkil etildi. Uni boshlash uchun buyruq berilgach, kuch va vositalar shartli ravishda favqulodda vaziyatga tenglashtirilgan holatni bartaraf etish va jabrlanuvchilarni qutqarishga kirishdi. Yong‘in o‘chirish guruhlari esa tezlik bilan voqea joyiga yetib keldi.
O‘quv mashqi yong‘in sodir bo‘lgan binodan odamlarni evakuatsiya qilish, yong‘inni o‘chirish, jabrlanganlarga birinchi tibbiy yordam ko‘rsatish va boshqa shu kabi qutqaruv tadbirlaridan iborat bo‘ldi. Favqulodda vaziyat sodir bo‘lgan bino va uning atrofini yoritish, qidiruv-qutqaruv ishlarini olib borish, avtonarvon orqali binoning yuqori qavatlarida qolib ketgan ishchi-xizmatchilar hamda moddiy boyliklarni xavfsiz hududga ko‘chirish ishlari amalga oshirildi.
Yong‘inni bartaraf etish guruhlari tomonidan “jabrlanuvchilar” narvon hamda ko‘targich texnikasi yordamida evakuvatsiya qilingan bo‘lsa, qutqaruv guruhlari bu ishni maxsus arqon va anjomlar yordamida amalga oshirdi.
Mashg‘ulot davomida favqulodda vaziyatlar sharoitida ixtisoslashtirilgan tuzilmalarning tezkor harakatlari ham amalda sinab ko‘rildi. Xususan, viloyat IIB tezkor tergov guruhi, Yo‘l harakati xavfsizligi boshqarmasi, Milliy gvardiya, tibbiyot, elektr, gaz, suv ta’minoti, avariya xizmati va boshqa korxona-tashkilot xodimlari o‘quv mashqida ishtirok etdi.
Viloyat FVB matbuot xizmati rahbari Qahramon Sattarovning bildirishicha, tezkor tadbirga 23 ta maxsus texnika jalb etildi. 30 nafardan ortiq “jabrlanuvchi”ga yordam ko‘rsatildi, ular orasida ayollar ham bor edi.
Ma’lumot uchun, Namangan viloyatida 2020-yil davomida 797 ta yong‘in sodir bo‘ldi. Ular oqibatida 5 kishi halok bo‘lgan, 15 kishi tan jarohati olgan.
Izoh (0)