Видео: Россия кўчаларида ҳақиқий ҳаётга кўчган Need For Speed ўйини

Россиялик стритрейсерлар ўзларининг YouTube’даги канали орқали машҳур Need For Speed пойга симуляторини реал ҳаётга кўчирди. Навбатдаги соннинг асосий қаҳрамонига BMW М4 айланди, деб хабар беради Motor.

Ролик аввалида бош қаҳрамон пойга учун машина танланган гаражда пайдо бўлган. Компьютер ўйинидаги каби машинани барча томондан томоша қилиш, спорткар кузови рангини танлаш, шунингдек, айрим созламаларни персоналлаштириш мумкин. Танлаб бўлингач, «ўйинчи» яшил BMW М4’ни танлаган.

Барча тайёргарликдан сўнг, М4 Россиянинг тунги кўчаларида пайдо бўлган. Содир бўлаётган воқеаларнинг барчаси анъанавий равишда учинчи шахс томонидан суратга олинган. Видеороликда ҳақиқий тасвирлар компьютер графикаси билан уйғунлаштирилган. Худди Need For Speed’даги каби кадрда виртуал харита, спидометр, шунингдек, тўпланган очколар пайдо бўлади.

Узоқ давом этмаган дрифтдан кейин BMW М4 пойга олдидан стартда рақиблари Lamborghini Huracan, Mercedes-AMG C 63 S ва Mitsubishi Lancer Evolution VIII билан пайдо бўлган. Пойга давомида бош қаҳрамон виртуал азот оксиди ёрдамида олдинлаб кетиб, пойгада ғолиб чиққан. Ролик муаллифининг сўзларига кўра, у уч дақиқали видеони тасвирга олиш учун икки ой вақт сарфлаган.

Эслатиб ўтамиз, 2020 йилнинг мартида Россиянинг кўча пойгачилари жамоаси Санкт-Петербургда худди Need for Speed: Most Wanted компьютер ўйинидаги каби саҳнани яратганди. Роликда BMW М3 GTR, Toyota Supra ва Porsche Cayman иштирок этган.