Фукусима АЭСдаги авариядан кейин 10 йил ўтди. Фалокат зонаси ҳозир қандай ҳолатда? (фото)
Роппа-роса ўн йил олдин Японияда 20 минг кишининг ҳаётига зомин бўлган улкан фалокат юз берди. Қарийб 9 баллик зилзила ортидан келиб чиққан цунами Фукусима атом электр станциясини ишдан чиқарди. Оқибатда хавфли радиация тарқалиб, инсон ҳаёти ва атроф-муҳитга таҳдид сола бошлади ва станция атрофидаги 160 мингдан зиёд аҳоли ўз уйини тарк этишга мажбур бўлди. Япония ҳукуматининг Фукусимадаги ҳаётни қайта тиклашга бўлган саъй-ҳаракатларига қарамай, аксарият маҳаллий аҳоли радиоактив таъсир хавфи ва инфратузилманинг етишмаслиги сабабли хароба ҳудудларга қайтишни истамаяпти. Фалокат зонасининг бугунги кундаги аҳволи ҳақида «РБК» фоторепортаж тайёрлади.
Сакаэ Като 2011 йил март ойида содир бўлган фожиадан сўнг Фукусима префектурасининг Намиэ посилкасидаги уйини ташлаб кетишдан бош тортди. Мана ўн йилдан буён у ёпиқ зонада яшаб, ташлаб кетилган мушукларга ғамхўрлик қилиб келади.Фото: Reuters
Ўн йил давомида Като 23 та мушукни тупроққа кўмган ва ҳозирда унинг қўлида 41 та мушук бор. Шунингдек, у бир итни қутқариб қолган ва ёввойи ҳайвонларни ҳам боқди.Фото: Reuters
57 ёшли Като табиий офатдан олдин кичик қурилиш компаниясига эга эди. У эгасиз уйларда ташлаб кетилаётган ва ўлаётган уй ҳайвонларини кўргач, 160 минг киши тарк этган хавфли зонада қолишга қарор қилди.Фото: Reuters
Като яшаётган жой уч авлод давомида унинг оиласига тегишли бўлган. «Мен кетишни истамайман, менга бу тоғларда яшаш ёқади», — дейди у.Фото: Reuters
Фожиадан кейин эвакуация амалга оширилган ҳудудларда алоқа узилган. Катонинг уйида сув йўқ, шунинг учун у хавфли зона ташқарисидаги жамоат ҳожатхоналаридан сув ташиб келишга мажбур.Фото: Reuters
Като ташлаб кетилган мушукларни тутиш ва қутқариш учун фойдаланадиган ўлжа солинган косани ушлаб турибди.Фото: Reuters
Катонинг сўзларига кўра, ҳайвонларга озиқ-овқат олиш учун ойига, тахминан, 7000 доллар пул кетади.Фото: Reuters
Сакаэ Като ёввойи чўчқаларни ҳам боқади. Одамлар ташлаб кетган ҳудудларда уларнинг сони кўпаймоқда. Маҳаллий ҳокимият Катонинг одамлар учун хавфли бўлиши мумкин бўлган ёввойи чўчқаларни парвариш қилаётганидан норози. 25 февраль куни Като чўчқани тузоқдан озод қилгани учун ҳибсга олинган.Фото: Reuters
Хисаэ Унума февраль ойида Фукусима префектурасидаги Футаба посёлкасида қолган ўзининг ташландиқ уйига ташриф буюрган эди. Унинг уйи АЭСдан 2,5 км узоқликда жойлашган. Уй ўн йил олдинги зилзилага дош берган, аммо ҳозир қулаб тушай деб турибди. «У ҳалиям тик турганига ҳайронман», — деди 67 ёшли фермер.Фото: Reuters
Фукусима Чернобилдан кейинги энг даҳшатли ядро ҳалокати бўлди. Табиий офатдан кейин 1150 квадрат километр ҳудуд зарарланган. Ушбу ҳудуд таркибига 11 та шаҳар ва кўплаб қишлоқлар киради. 20 минг одам фожиа қурбонига айланди ва префектуранинг 160 мингдан ортиқ аҳолиси ўз уйларини тарк этди.Фото: Reuters
Табиий офатдан кейин Унумага тегишли 50 сигирдан фақат биттаси омон қолган. Сигир Унума ва унинг ўтган ҳаётини боғлаб турган сўнгги нишонага айланди.Фото: Reuters
Унума ҳозирда Токио яқинидаги Сайтама префектурасида сабзавот етиштиради. 3 йил олдин Сайтамада унинг эри вафот этган. Аёлнинг айтишича, ҳукумат унинг далаларидан радиоактив тупроқни қириб ташлаган тақдирда ҳам Футабага қайтмайди.Фото: Reuters
Унинг эски уйи атрофидаги радиация даражаси Токиодаги нурланиш даражасидан, тахминан, 20 баравар юқори.Фото: Reuters
Токио Олимпиадасига тайёргарлик кўриш жараёнида Фукусимани миллий тикланиш рамзига айлантирган ҳукумат аҳолини зарарсизланган ҳудудга қайтишга чақирмоқда. Бироқ кўпчилик ҳалиям атом электр станцияси, янги зилзилалар хавфи, иш жойлари ва сифатли инфратузилманинг етишмаслигидан хавотирланмоқда.Фото: Reuters
Изоҳ (0)