Чернобилдан кейинги энг даҳшатли ядровий фалокат. Фукусима фожиаси — суратларда
Япония 11 март куни мамлакатда 10 йил олдин юз берган даҳшатли зилзила ва цунами ҳамда унинг оқибатида келиб чиққан Фукусима ядровий аварияси қурбонлари учун мотам тутди. Мамлакат императори Нарухито ва бош вазир Ёсихиде Суга қурбонлар хотирасига бир дақиқа сукут сақлади. Роппа-роса ўн йил олдин Японияда 20 минг кишининг ёстиғини қуритган фожиа ҳақида Reuters фоторепортаж тайёрлади.
Фото: Reuters
2011 йил 11 март куни салкам тўққиз баллик зилзила бутун Японияни қалқитиб юборди. Бу ўз навбатида цунамига туртки бериб, зилзиладан омон қолган жойларни сув босди.
Фукусима префектурасидаги Иваки шаҳрида цунами ва зилзиладан сўнг ҳосил бўлган гирдоблар. 2011 йил, 11 март.Фото: Reuters
Авариядан бир кун ўтиб, реакторлардан бири жойлашган бино портлади. Икки кундан сўнг бошқа реактор биносида портлаш янгради. Яна бир кундан кейин учинчи реактор биносида ҳам ўхшаш воқеа юз берди. Натижада хавфли радиация тарқалиб, инсон ҳаёти ва атроф-муҳитга таҳдид сола бошлади ва станция атрофидаги 160 мингдан зиёд аҳолини қочишга мажбур қилди.
Фукусима — 1986 йилдаги Украинанинг Чернобил атом электростанциясидаги портлашдан кейин, инсоният тарихида энг даҳшатли ядровий фалокатга айланди.
Фожиадан бир кун ўтиб, Минамисанрику посёлкасининг марказий қисми вертолётдан олинган тасвирда. 2011 йил, 12 март.Фото: Reuters
Цунами денгизга оқизиб кетган 60 ёшли Ҳиромицу Шинкава фожиадан икки кун ўтиб, қидирув қутқарув экипажи томонидан Фукусима префектурасидан 15 км узоқликда ўзи билан оқиб кетган уйининг томига тирмашиб олган ҳолда топилди. 2011 йил, 13 март.Фото: Reuters
Ватари посёлкасида фожиа оқибатида вайрон бўлган ҳудуд қабристонига келиб қолган машина. 2011 йил, 22 апрель.Фото: Reuters
Фожиадан омон қолганлар вайрон бўлган уйидан бор-йўғи икки тугун буюм йиғиб олди. 2011 йил, 17 март.Фото: Reuters
Фожиадан икки ҳафта ўтиб, вайрон бўлган уйидан нарсаларини йиғиб кетаётган эркак цунами сабаб қуруқликка чиқиб қолган кемага дуч келди. 2011 йил, 27 март.Фото: Reuters
Фукусима атом станцияси атрофидаги қариялар уйидан эвакуация қилинган одамлар Кориямадаги вақтинчалик бошпанада дам олмоқда. 2011 йил, 13 март.Фото: Reuters
Япониянинг ўша пайтдаги императори Акихито ва унинг рафиқаси Мичико Токиога эвакуация қилинган одамлар билан суҳбатлашмоқда. 2011 йил, 30 март.Фото: Reuters
Фукусима атом станцияси яқинидаги эвакуация зонасидан олиб келинган болаларда нурланиш белгилари бор-йўқлиги текширилмоқда. 2011 йил, 13 март.Фото: Reuters
Радиация даражаси юқори бўлганларни скрининг, тозалаш ва изоляция қилишга мўлжалланган вақтинчалик муассасада изоляцияга олинган қиз, ойна ортидан итини эркаламоқда. 2011 йил, 14 март.Фото: Reuters
Tokyo Electric Power компанияси ишчилари Фукусима станциясидан 22 км узоқликда жойлашган Каваучи қишлоғидаги гимназияда, станция атрофидаги тақиқланган зонада қолган уйларига қисқа муддатга бориб келиш учун тайёргарлик кўраётган қишлоқ аҳолисига таъзим қилиб, узр сўрамоқда. 2011 йил, 10 май.Фото: Reuters
Япония шимолидаги Ямада шаҳрининг вайрон бўлган қисмида одамлар ёрдам олиш учун узун навбат ҳосил қилиб турибди. 2011 йил, 26 март.Фото: Reuters
Tokyo Electric Power компанияси раҳбарлари ва япон журналистлари автобус ойнасидан ишдан чиққан Фукусима АЭСга қараб турибди. 2011 йил, 12 ноябрь.Фото: Reuters
Фожиадан кейин Кесеннума шаҳридаги вайрон бўлган портда кезиб юрган киши. 2011 йил, 28 март.Фото: Reuters
Эвакуация қилинган одамлар Фукусима АЭСдан 20 км узоқликдаги тақиқланган зонада қолган уйларига комбинезонда келиб нарсаларини йиғиштириб кетмоқда. 2011 йил, 10 май.Фото: Reuters
Зилзила ва цунами оқибатида шикастланган оилавий фотосуратлар волонтёрлар томонидан ювиб қуритилмоқда. 2011 йил, 12 апрель.Фото: Reuters
Исиномаки шаҳрида фожиа оқибатида вайрон бўлган болалар боғчаси деворида осилиб қолган фотосурат ва сув излари. 2011 йил, 7 апрель.Фото: Reuters
Зилзила ва цунамидан кейин бутунлай ёниб кетган Кадоноваки бошланғич мактаби ёнида турган киши. 2011 йил, 7 апрель.Фото: Reuters
Изоҳ (0)