АҚШнинг ҳужжатлаштирилган тарихида 2020 йил ўлимлар сони жиҳатидан энг ёмон йил бўлди. Ўтган йили мамлакатда рекорд даражадаги ўлим кўрсаткичи қайд этилган. Бу ҳақда Касалликларни назорат қилиш ва олдини олиш маркази (CDC) расман эълон қилди, дея хабар беради Politico нашри.
2020 йилда АҚШда уч миллиондан ортиқ одам вафот этди. Уларнинг 400 мингга яқини коронавирус қурбонлари. Вирус америкаликларнинг ўлимига сабаб бўлган касалликлар қаторида юрак-қон томир ва онкологик касалликлардан кейин учинчи ўринни эгаллади.
Пандемия туфайли 2020 йилда АҚШдаги ўлим даражаси 2019 йилга нисбатан 15 фоизга ортган. Бу 1918 йилдаги Биринчи Жаҳон уруши мобайнида юз минглаб одамлар Испания гриппидан вафот этган вақтдан бери энг катта ўсишдир. Таққослаш учун, 2019 йилда ўлим даражаси 2018 йилга нисбатан 1,2 фоизга камайган эди.
Нашрнинг ёзишича, ушбу маълумотлар CDC’нинг ҳафталик касалланиш ва ўлимлар ҳақидаги ҳисоботининг навбатдаги сонида эълон қилинади.
Жонс Ҳопкинс университети маълумотларига кўра, пандемия бошидан бери АҚШда 29 миллион киши коронавирусга чалинган, 5,2 минг киши касалликдан вафот этган.
Эслатиб ўтамиз, 23 февраль куни Қўшма Штатларда коронавирус қурбонлари сони 500 минг кишидан ошди. Шу муносабат билан Байден вафот этганлар учун мотам белгиси сифатида бутун мамлакат бўйлаб беш кунга байроқларни туширишни буюрди.
АҚШда коронавирусдан вафот этганлар сони Биринчи ва Иккинчи жаҳон уруши ҳамда Вьетнам уруши пайтида ҳалок бўлганларнинг умумий сонидан ошиб кетган.
The New York Times 21 февраль кунги сонининг биринчи саҳифасида коронавирус қурбонлари сонини англатувчи 500 мингта нуқтадан иборат график тасвирини чоп этди. Тасвир қурбонлар сонининг ўсиш тезлигини акс эттиради.
Изоҳ (0)