Жиззах вилоятининг Фориш туманида Cobalt ва Волга тўқнашиши оқибатида уч киши вафот этди, яна бири жароҳатланди. Вилоят ИИБ матбуот хизматининг хабар беришича, воқеа туманнинг «Учма» МФЙ ҳудудидан ўтган Жиззах —Фориш —Қизилча 4Р-36 йўлининг 85-километрида юз берган.
Навоий вилояти Нурота туманида яшовчи Ж.С. Cobalt’ни ҳайдаб кетаётиб Фориш тумани Қўлба қишлоқ фуқаролар йиғинида яшовчи З.Д. бошқарувидаги «ГАЗ-31» («Волга») билан тўқнашган. Оқибатда Cobalt’да ёнғин келиб чиққан ва унинг ҳайдовчиси Ж.С. ва йўловчи Х.Г. куйиш жароҳатидан вафот этган.
«Волга» ҳайдовчиси Б.Т. туман тиббиёт бирлашмасида кўрсатилган ёрдамга қарамасдан, ҳаётдан кўз юмган. Унинг йўловчиси И.Э. эса бош мия ёпиқ жароҳати, бош мия чайқалиши, чап болдир суягининг ёпиқ синиши ташхиси билан шифохонанинг травматология бўлимига ётқизилган.
Ҳолат бўйича жиноят иши қўзғатилган.
Аввалроқ Фарғонада Lacetti билан тўқнашган Matiz ёниб кетиши оқибатида икки йўловчи аёл вафот этгани, Деҳқонободда Шаҳрисабздан келаётган юк машинасида ёнғин чиққани, Сурхондарёдан Тошкентга йўлга чиққан Nexia’нинг ёниб кетиши оқибатида 3 киши вафот этгани ҳақида хабар берилган эди.
Изоҳ (0)