Навоий вилоятининг Конимех туманида содир бўлган ЙТҲда 58 ёшли туман ободонлаштириш бўлими ходими вафот этди. Бу ҳақда «Дарё»га вилоят ИИБ ЙҲХБ матбуот гуруҳи раҳбари Фарруҳ Якубов хабар берди.
Таъкидланишича, 2021 йилнинг 27 февраль куни соат 09:30 да туман ободонлаштириш бўлимида ишловчи бир нечта ходимлар Конимех туманидан ўтган А-379 халқаро аҳамиятга эга автомобиль йўлининг четки қисмидан велосипедда ҳаракатланиб келаётганда Навоий—Зарафшон йўналишида катта тезликда ҳаракатланиб келган 67 ёшли Тicо ҳайдовчиси велосипед бошқариб кетаётган фуқарони уриб юборган.
Автоҳалокат оқибатида 58 ёшли жабрланувчи воқеа жойида вафот этган. Тicо ҳам йўлдан чиқиб кетиб, бетон тўсиққа урилган ва жиддий талафот олган.
«Конимех туман йўллардан фойдаланиш» унитар корхонаси раҳбари Улуғбек Раҳматовнинг билдиришича, А-379-автомобиль йўлига мазкур давлат унитар корхонаси хизмат кўрсатади. Унинг таъкидича, ушбу йўлга йўл ётиқ чизиқлари чизилган, нур қайтарувчи янги йўл белгилари ўрнатилган. Ёритиш чироқлари мавжуд ва йўлда автотранспорт ҳодисаларига сабаб бўладиган ўйдим-чуқур камчиликлар ҳам йўқ.
Мазкур ҳолат юзасидан Конимех туман ИИБ тергов бўлими томонидан ҳайдовчи Н.Х.га нисбатан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган. Айни пайтда тергов ҳаракатлари давом этмоқда.
Изоҳ (0)