АҚШнинг Сурияга уюштирган ҳужумидан кейин Демократлар ва Республикачилар партияларидан сенаторлар Тим Кейн ва Тодд Янг президентнинг ҳарбий куч ишлатишдаги ваколатларини чеклаш тўғрисидаги қонун лойиҳасини тақдим этди. Илгари сенаторлар Президент Дональд Трамп даврида ҳам худди шундай қонун лойиҳасини илгари сурган, аммо давлат раҳбарининг ветосидан ўтолмаган, деб ёзади «Коммерсантъ».
«Ўтган ҳафта Сурияга уюштирилган ҳаво ҳужумлари шуни кўрсатадики, партиясидан қатъи назар, ижро этувчи ҳокимият ҳарбий ваколатларини кенгайтиришда давом этаверади. Конгресс нафақат янги ҳарбий операцияларга овоз бериш, балки энди кераксиз бўлган ҳарбий операциялар учун қабул қилинган аввалги қарорларни қайта кўриб чиқиш учун ҳам жавобгардир», — деди демократ Тим Кейн ўз баёнотида.
Ушбу қонун лойиҳаси «Ироққа қарши уруш учун асос бўлувчи» 1991 ва 2002 йилги қарорларни чеклайди. Сенаторнинг сўзларига кўра, ушбу қарорлар АҚШни «уруш ёқасида» ушлаб турибди ва Ироқнинг суверенитетига путур етказмоқда. Кейннинг таъкидлашича, мазкур қарорларнинг бекор қилиниши Форс кўрфази ва Ироқдаги урушларга якун ясайди.
2020 йилда АҚШ Конгресси ўша пайтдаги президент Дональд Трампнинг ҳарбий ҳаракатлар уюштириш имкониятини чекловчи қонун лойиҳасини маъқуллаган эди. Ўшанда масала Бағдод аэропортининг ўққа тутилиши ва ҳужум оқибатида Ислом инқилоби муҳофизлари корпуси (ИИМК) «Ал-Қудс» махсус бўлинмаси раҳбари генерал Қосим Сулаймонийнинг ўлдирилиши билан боғлиқ бўлган эди. Трамп ҳужжатга вето қўйган ва Сенат уни енгиб ўтолмаган.
Жо Байден томонидан маъқулланган қарорга кўра эса, 2021 йил 26 февралга ўтар кечаси АҚШ Сурияда Дамашқни қўллаб-қувватловчи эронпараст кўнгиллилар қўшини билан боғлиқ бинога авиазарба берган. Маълумотларга кўра, зарба мудофаа хусусиятига эга бўлган ва февраль ойида кўнгиллилар қўшини томонидан Америка ҳарбийларига уюштирилган учта ҳужумга жавоб бўлган.
Шундан кейин Эрон АҚШнинг Яқин Шарқдаги ҳаракатлари минтақадаги зўравонликни кучайтириши мумкинлигидан хавотир билдирди. АҚШнинг Суриядаги Эронга алоқадор объектларга ҳаво зарбасини бериши минтақадаги зўравонликларни янада кучайтириб юбориши мумкин, деди Эрон президент аппарати ҳузуридаги Стратегик тадқиқотлар маркази халқаро лойиҳасининг директори Диако Ҳусайний.
Изоҳ (0)