Британия қироллик оиласининг хизматчилари шаҳзода Гаррининг рафиқаси Меган Марклни тазйиқ ўтказиш ва таҳқирлашда айблади

The Times газетаси шаҳзода Гаррининг рафиқаси герцогиня Меган Маркл томонидан Кенсингтон саройи хизматчиларига нисбатан тазйиқ ва таҳқирлашлар ҳақида ҳикоя қилди. Унга жавобан Маркл бундай «ҳужум» дан «хафа бўлганини» маълум қилди, деб ёзади Meduza.

The Times’нинг навбатдаги сонида шаҳзода Гарри ва Меган Марклнинг собиқ матбуот котиби Жейсон Кнауфнинг электрон хатидан парчалар нашр этилди. 2018 йил октябрь ойида ёзилган мактубда герцогиня икки ходимни ҳайдаб юборгани ва яна бир хизматчига нисбатан «ишончни поймол қилгани» ҳақида шикоят қилинган. The Times газетасининг манбасига кўра, гўёки шаҳзода Гарри Кнауфдан ушбу маълумотни тарқатмасликни илтимос қилган.

Мактуб Гаррининг акаси, шаҳзода Уильямнинг ўша пайтдаги котиби Симон Кейсга юборилган (Уильям ва унинг рафиқаси Кейт Мидлтон Кенсингтон саройида илгари шаҳзода Гарри ва Меган Маркл билан бирга яшаган). Унда қайд этилишича, сарой ходимларини ёллаш бўйича масъул бўлган Саманта Каррутерс «вазият жуда жиддий» эканини тасдиқлаган. Кнауф хатда  «Мен буларнинг ҳаммаси шу ҳолича қолишидан хавотирдаман», деб ёзган.

The Times манбалари, шунингдек,  Меган Маркл баъзи хизматчиларни тазйиқ остига олгани ва уларнинг баъзиларини ҳатто йиғлатганини таъкидлади. Нашр суҳбатлашган хизматчилардан бири герцогиня уни бир неча бор камситганини айтган.

The Times нашри манбалари ушбу ҳолат ўрганилмагани ва шу пайтгача хизматчиларни қирол оиласи аъзоси томонидан бўладиган эҳтимолий тазйиқлардан ҳимоя қилиш учун ҳеч қандай чора кўрилмаганига хавотир билдирди. Улар Меган ва Гаррининг америкалик телебошловчи Опра Уинфри билан интервьюси намойиш этилишидан олдин безорилик ҳақида оммага маълум қилишга қарор қилгани, чунки жамоатчилик бошқа нуқтаи назарни ҳам билиши кераклигини айтди. Интервью 7 март куни CBS телеканалида намойиш этилади.

Сассекс герцоги ва герцогинясининг расмий вакили Меганнинг «атай уюштирилган бўҳтонлар қурбони» бўлганини айтди. Герцогиня ўз вакили орқали, айниқса, ўзининг қачонлардир «тазйиққа учрагани» ва шундай вазиятга тушган одамларни қўллаб-қувватлашини ҳисобга олиб, унга қилинган «ҳужум»дан хафалигини билдирди   «У бутун дунёда меҳр-оқибат ҳиссини тарбиялаш бўйича ишларини давом эттиришга қатъий қарор қилган ва доим яхшилик қилишнинг намунаси бўлишга интилади», — дея қўшимча қилди вакил.

Ўз навбатида, эр-хотин шаҳзода Гарри ва Меган Марклнинг адвокатлари The Times газетасини жуфтликнинг Опра Уинфри билан интервьюси олдидан «бутунлай ёлғон маълумотни тарқатишда Букингем саройидан фойдаланганликда» айблади.

Буюк Британия қироличаси Елизавета II нинг расмий қароргоҳи бўлмиш Букингем саройи Меган Марклга қўйилган айбловлар юзасидан текширув ўтказилишини маълум қилди.

Маълумот учун, шаҳзода Гарри ва Меган Маркл 2018 йил май ойида турмуш қурган. Тўйдан кейин улар бир мунча вақт Кенсингтон саройида яшаган. 2020 йил январь ойида эр-хотин қироллик ваколатларидан воз кечиб, аввал Канадага, сўнгра АҚШга кўчиб ўтди. Улар Spotify ва Netflix стрим хизматлари билан шартномалар тузди. Яқинда жуфтлик иккинчи фарзандини кутаётганини эълон қилди.