Германия канцлери Ангела Меркель Германиянинг Wirecard электрон тўловлар операторининг фирибгарлиги юзасидан текширув бўйича Бундестаг қўмитаси олдида гувоҳлик беради. Бу ҳақда Bild нашри ва DPA агентлиги ўз манбаларига асосланиб хабар берди. Шунингдек, ушбу маълумотни қўмита аъзоси Флориан Тонкар тасдиқлади, деб ёзади Meduza.
Хабарга кўра, Бундестаг қўмитаси зиммасига Германия ҳукуматининг Wirecard можароси билан боғлиқ қандай хатоларга йўл қўйганлигини аниқлаш вазифаси юклатилган.
Меркель 23 апрель куни қўмита аъзолари олдида сўзга чиқади. Қўмитага гувоҳ сифатида вице-канцлер ва молия вазири Олаф Шолз, шунингдек, иқтисодиёт вазири Петер Алтмаер таклиф қилинган. 20 апрель куни Алтмаернинг, 22 апрель куни эса Шолзнинг гувоҳлик чиқиши бўлиб ўтади.
Меркелга 2019 йил сентябрь ойида Хитойга расмий ташрифи чоғида нима учун у Wirecard манфаатларини илгари сургани тўғрисида саволлар берилиши кутилмоқда, чунки ўша пайтга қадар ОАВ аллақачон Wirecard фирибгарлиги ҳақида ёзган, Сингапурда эса компаниянинг фаолияти бўйича тергов олиб борилаётган эди.
Маълумот учун, Германиянинг Wirecard компанияси ўз фаолиятини 1999 йилда бошлаган. У банк ва йирик тўлов тизимлари ҳамкорликдан бош тортган мижозлар, масалан, порнографик сайтлар ва ноқонуний казиноларга тўловларни амалга ошириш масалаларида хизмат кўрсатган. 2018 йилга келиб Wirecard Германиянинг энг таниқли стартапларидан бирига айланди ва мамлакатдаги ўттизта энг йирик компаниялар қаторига кирди.
2020 йил июнь ойида аудиторлар Wirecard ҳисобварақларида 2 миллиард евро камомадни аниқлади. Компаниянинг бош директори Маркус Браун ҳибсга олинган ва юқори раҳбарият ишдан бўшатилган. Фирибгарликнинг асосий гумонланувчиси ҳисобланган Wirecard бош операцион директори австриялик Ян Марсалек ғойиб бўлган. Германия ва Австрия ҳукумати уни қидирмоқда.
The Insider, Bellingcat ва Der Spiegel томонидан олиб борилган текширувлар натижалари шуни кўрсатдики, Марсалек 10 йил ичида Россияга 60 мартадан кўпроқ ташриф буюрган ва Россия махсус хизматлари билан ҳамкорлик қилган бўлиши мумкин. Германиянинг Handelsblatt нашри Марсалек Россияда яширингани, у ерга Беларусь орқали ўтиб кетгани ҳақида хабар берган.
Изоҳ (0)