АҚШнинг собиқ президенти Дональд Трамп маъмурияти даврида Давлат департаментини бошқарган Майкл Помпео 2024 йилги сайловларда давлат раҳбари лавозимига ўз номзодини қўйиши мумкин. Бу ҳақда у Fox News телеканалида маълум қилди, деб ёзмоқда «ТАСС».
Телебошловчи собиқ давлат котибидан агар Трамп номзодини қўймасликка қарор қилса, унинг келгуси сайловларда президентлик пойгасига киришга тайёр ёки йўқлигини сўради. «Мен ҳар доим жанг қилишга тайёрман. Мен Америка учун ниҳоятда хавотирдаман», — деб жавоб берди Помпео. Шунингдек у узоқ вақтдан бери консерватив ҳаракатларнинг бир қисми бўлиб келаётганини таъкидлади. «Худди шу қарашларга риоя қилишда давом этишни режалаштирмоқдаман», — деди у.
2021 йил 28 февраль куни Трамп Флорида штатидаги Орландо шаҳрида АҚШ консерватив доиралари конференциясида нутқ сўзлар экан, ўзининг яна президентлик учун курашда қатнашиши мумкинлигини тан олди. Bloomberg агентлиги хабарига кўра, собиқ президент агар президентлик пойгасида қатнашса, унинг маъмуриятида вице-президент бўлиб ишлаган Майк Пенсни ўз сайловолди кампаниясига жалб қилишни режалаштирмаяпти. Шу билан бирга, Трампнинг маслаҳатчиси Жейсон Миллер агентлик мухбирларига берган баёнотида Трампнинг 2024 йилги президентлик сайловларига номзодини қўйиши тўғрисида ҳали якуний қарор қабул қилмаганини айтди.
Аввалроқ АҚШ полициясига келиб тушган огоҳлантирувчи хабарлар ва разведка маълумотлари туфайли Вашингтондаги Капитолий биноси атрофида хавфсизлик чоралари кучайтирилаётгани ҳақида хабар берилганди. Washington Post газетасининг таъкидлашича, ўнг қанот радикаллари 4 мартни «ҳақиқий инаугурация куни» деб атаб, ўша куни АҚШнинг собиқ президенти Дональд Трамп иккинчи президентлик муддати учун қасамёд келтиради, деган уйдирмаларни тарқатмоқда. АҚШ Конгресси Вакиллар палатаси хавфсизлик хизматининг Капитолийга ҳужум уюштирилиш хавфи ҳақидаги огоҳлантиришлари сабабли 4 март куни ўтказиладиган мажлисни бекор қилди.
Изоҳ (0)