Туркманистон президенти Гурбангули Бердимуҳамедов 3 март куни Хавфсизлик кенгаши ҳуқуқ-тартибот идораларининг 2021 йилнинг сўнгги икки ойидаги ишлари натижаларига бағишланган йиғилиш ўтказди, деб хабар бермоқда «Хроника Туркменистана».
Қайд этилишича, йиғилишда бирон-бир муҳим мавзу муҳокама қилинмаган.
Мудофаа вазири Бегенч Гундогдиев 27 сентябрь куни Туркманистон мустақиллигининг 30 йиллиги шарафига бўлиб ўтадиган ҳарбий парадга тайёргарлик тўғрисида ҳисобот берди. Таъкидланишича, 2021 йил парадни янги ҳукумат майдони олдида ўтказиш режалаштирилган.
Президент Ички ишлар вазирлиги раҳбари Мамметхан Чакиевга йўлларда ҳуқуқбузарликларни қатъий назорат қилишни ва пиёдалар, айниқса мактаб ўқувчилари ўртасида йўл ҳаракати қоидалари тўғрисида тушунтириш ишларини олиб боришни топширди.
Бош вазирнинг рақамлаштириш бўйича ўринбосари, Олий назорат палатаси раҳбари ва Хавфсизлик кенгаши аъзоси Сердар Бердимуҳамедов давлат мулкини назорат қилиш ва рақамли тизимларни жорий этиш бўйича ишлар тўғрисида ҳисобот берди. Хабарда қандай ишлар қилинганлиги ҳақида маълумот берилмаган.
Бердимуҳамедов ҳисоботлардан мамнун бўлиб, Хавфсизлик кенгашининг барча аъзоларига, жумладан, ўғли Сердар Бердимуҳамедовга «Туркманистон Ватанининг ҳимоячиси» фахрий унвонини бериш тўғрисидаги қарорини эълон қилди.
https://giphy.com/gifs/3y6UJStOzMxAQQOt5j
Эслатиб ўтамиз, ушбу унвон 2021 йил 16 январда таъсис этилган ва Хавфсизлик кенгаши аъзоларига давлат мустақиллиги, суверенитети, ҳудудий яхлитлиги, конституциявий тузум, қонунийлик ва ҳуқуқни муҳофаза қилишда катта хизматлари бўлган аъзоларга берилади. Унга сазовор бўлганлар тегишли нишон билан тақдирланади.
Аввалроқ Сардор бош вазир ўринбосари лавозимига тайинланганди. Шунингдек, бироз аввал у Хавфсизлик кенгаши аъзоси сифатида тасдиқланди. Нашрнинг маълум қилишича, у кенгаш аъзоси сифатида ҳали бирон сезиларли иш қилмаган. Унга қайси хизматлари учун унвон берилганлиги ҳам номаълум.
Шунингдек, Сердардан ташқари бир қатор амалдорларга мазкур унвон берилди.
Бундан аввал Туркманистон президенти пойтахтнинг юбилейи куни туғилган биринчи чақалоққа Ашхобод деб исм қўйишни буюргани, Туркманистон биржасида президент автокарвонининг зирҳли машиналари яна сотувга қўйилгани ҳамда Бердимуҳамедов Ашхобод юбилейи ва Туркманистон мустақиллигига тайёргарлик кўриш ишларидан норози бўлгани ҳақида хабар берилганди.
Изоҳ (0)