Kontrabandaga qarshi kurashish va bojxona auditi bosh boshqarmasi tarkibida tashkil etilgan maxsus tarkibiy tuzilma — situatsion markazning ochilish marosimi 3-mart kuni bo‘lib o‘tdi, deb xabar bermoqda “Gazeta.uz” Davlat bojxona qo‘mitasi matbuot xizmatiga tayanib. Ushbu boshqarma 2020-yilning yozida Prezident farmoni bilan tashkil etilgan edi.
Birinchi shunday situatsion markaz Yaponiya hukumati ko‘magida BMTning Giyohvand moddalar va jinoyatchilik bo‘yicha boshqarmasi (UNODC)ning Markaziy Osiyo bo‘yicha mintaqaviy vakolatxonasi bilan hamkorlikda tashkil etildi.
Ushbu maxsus markaz xorijiy davlatlar bojxona xizmatlarining ilg‘or tajribalariga asoslangan zamonaviy axborot texnologiyalari va imkoniyatlardan, shuningdek, tahlil usullaridan foydalangan holda real vaqt rejimida bojxona obyektlarini keng miqyosda masofadan turib boshqarishni amalga oshirishi ta’kidlangan.
UNODC vakillarining ma’lum qilishicha, situatsion markaz avtomobil va temiryo‘l nazorat punktlari, shuningdek, aeroportlardagi nazorat punktlari ishini monitoring qilish sohasida idoralararo muvofiqlashtirishni kuchaytiradi. Shuningdek, huquqni muhofaza qilish organlari tezkor bo‘linmalarining tahliliy salohiyatini oshirishga yordam beradi.
Shuningdek, ma’lumotlarni markazlashtirilgan tarzda yig‘ish, qayta ishlash va tahlil qilishni, giyohvand moddalar savdosi, transchegaraviy jinoyatlar, kontrabanda va bojxona qoidalarini buzish bilan kurashish sohasida boshqa mamlakatlar bilan axborot almashinuvida hamkorlik qilishni yengillashtirishga yordam beradi.
Markaz milliy, ham mintaqaviy, ham xalqaro darajadagi turli xil huquqni muhofaza qilish idoralari hamkorligidagi operatsiyalarni tezkor muvofiqlashtirish markazi vazifasini bajaradi.
Izoh (0)