Тошкент давлат юридик университети 3-босқич талабаси Баҳодир Бозоров бахтсиз ҳодиса оқибатида вафот этди. Бу ҳақда университетнинг Telegram каналида хабар қилинди.

Фото: ТДЮ

Бош прокуратуранинг «Дарё»га маълум қилишича, ҳодиса 27 февраль куни тахминан соат 22:30 ларда юз берган. Сурхондарёлик 27 ёшли йигит 2021 йилнинг 9 январидан буён Xuber Global Konctruction МЧЖда синов муддати асосида ишга қабул қилиниб, Тошкент шаҳри Бектемир тумани Ҳусайн Бойқаро кўчаси 9-уйдаги қурилиши тугалланмаган бинода ишлаб, яшаб келган. Баҳодир Бозоров мазкур бинонинг иккинчи қаватидан лифт учун мўлжалланган шахтанинг ичига қулаб тушган.

Республика шошилинч тиббий ёрдам илмий маркази Тошкент вилояти филиалининг 27 февралдаги 1-сон далолатномасида Бозоров шифохонага олиб келтирилган вақтда вафот этган бўлганлиги кўрсатилган.

Ҳозирда ҳолат бўйича суд тиббий экспертизаси тайинланиб, меҳнатни муҳофаза қилиш ва меҳнат шароитлари экспертизаси Давлат инспекциясига ҳолат юзасидан хулоса тақдим этиш учун терговга қадар текширув давомида тўпланган ҳужжатлар тақдим этилган.

Бош прокуратуранинг маълум қилишича, терговга қадар текширув ишлари давом этмоқда.

Эслатиб ўтамиз, 27 февраль куни Юнусободда ижарада яшовчи беш нафар талабанинг мурдаси топилди. Уларнинг уч нафари Тошкент Ахборот технологиялари университети, бир нафари Сингапур менежментни ривожлантириш институти, яна бир нафари Инҳа университети талабаси бўлган. Жабрланувчиларнинг ўлими номаълум моддадан ўткир заҳарланиш натижасида юз берган. Ушбу фожиадан сўнг ижарада яшовчи талабаларни мониторинг қилиш бўйича топшириқ берилди.