Наманган вилояти Тўрақўрғон туманида «Ҳар бир оила тадбиркор» дастури доирасида ажратилган маблағлар талон-торож қилингани аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Бош прокуратура ҳузуридаги департаментнинг Тўрақўрғон туман бўлими томонидан ўтказилган терговга қадар текширувда «К.Д.» номли МЧЖ раҳбари М.У. «Ҳар бир оила тадбиркор» дастури доирасида АТ «Халқ банки» Тўрақўрғон филиалидан турли фуқаролар номига тикувчилик дастгоҳлари сотиб олиш учун жами 155,2 миллион сўм кредит маблағларини ажратгани маълум бўлган.
М.У. ушбу кредит маблағларини қалбаки ҳужжатларни расмийлаштириш орқали ўзлаштириш йўли билан талон-торож қилган.
Мазкур ҳолат юзасидан жамият раҳбари М.У.га нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш), 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Пискентда 1,3 млрд сўмлик имтиёзли кредитни талон-торож қилган фермер хўжалиги раҳбарига жиноят иши қўзғатилгани тўғрисида хабар берилганди.
Изоҳ (0)